جاني خبر خيَّم عليه ظلاله
يوم الأحد لاعاد علم سمعناه
قالوا لي سليمان أقفت رحاله
عزيز غالي والله إنا فقدناه
حتى حمام الدوح يبكي وفاء له
كم ليلة عشاه والظهر غداه
راع الكرم والجود دمثه خصاله
تواضعه للغير قمة مزاياه
للجار والخطار واسع مجاله
تعطي يمينه مادرت عنه يسراه
واهل الحوايج كل ساعة قباله
يرجون فيض الخير من كف يمناه
ماصك بابه.. ما يشح برياله
دايم بشوش الوجه يضحك محياه
عسى جنان الخلد يارب فاله
في جنة الفردوس لعل سكناه
وعسى العوض في من بقى من عياله
يحيون ذكره بالوفى طاب مثواه
وأطلب من الخلاق جل جلاله
يروي ثرى قبرة بـ هتان يغشاه