سحابة خيالي لا عترضلك نسيم البـوح
وسرا في ركونك نوض برق سرا ليلـه
وقام يتساما فوق سامي سماك صـروح
ووبلك تهاما بارض صـدري هماليلـه
تهادي على صوت الرعد والبروق تلوح
وقولي لها الدنيا يادنيا مـن انتـي لـه
ماضر اعنف الطوفان مجرى سفينة نوح
ولاسر كسرى عـرش ملكـه واكاليلـه
سهد ناظري جهد الصبابه بلا مصلـوح
كانـه يمنيـه السهـى مـن قناديـلـه
كفى ياعذولي لا تزيد الجـروح جـروح
كفى لا تقف فـي درب همـي وتوميلـه
انا ادرى بحالي لو خيالي بعيد الشـوح
اسايـر زمانـي واوزن الهـم واكيلـه
بصدر كتوم ومقلـة سرهـا مفضـوح
لها عابر يحدى الضمى عـن مناديلـه
بعبره لها نبره على صوتـي المبحـوح
اخفي ذهولـي عـن عذولـي وتبديلـه
واضم الاصابع والروابع تجي وتـروح
على صالـي جمـره تعاقـب معاميلـه
اليا ردد الموال حولـي حمـام الـدوح
دعيتـه يغنيلـي بصوتـه واغنيـلـه
يغني طرب ويحاكي الحزن يوم ينـوح
واعانـي معاناتـه واجـاوب مواويلـه
لعله يسلي خاطري عن تويـم الـروح
بعد مافقدت اجمل امـل مـن مراسيلـه
فقدته ولا ادري بعد ماراح ويـن اروح
شفوق على وصله وانا ما معـي حيلـه
شفوق عليه اشفق من الظامي المشفـوح
على رشفة الما بعد هـد الظمـى حيلـه
قبل كنت اظن ان الهوى تسليه ومـزوح
وتوهقت يـوم انـي وقعـت بمحابيلـه
محابيل حب الفارع البـارع المملـوح
برا منه حالـي واستحالـت مواصيلـه
لجل خاطره كم كنت اجامل وانا مجروح
احب اختيار الصعب من كثر حبـي لـه
اجامل وصدري من لهيب الغرام يفـوح
له اميل لو ما ارضى على نفسي الميلـه
على لا خطأ لمني ومنك الخطأ مسموح
تدلـل وغيـرك ما تـعـودت تدليـلـه
اداري وانا داري ولاني قصير شبـوح
لكن الفـواد اذا انتحـى ويـش اسويلـه

هلال عوض المطيري