انا واعوذ بالله من كلمة انا... عارف انه اغلب الحبايب حيقولوا ايش حكاية كوبري الخير ده يبو فتو... انا اقولكم ايش الحكاية بس انتو خليكم معايا وانتو تعرفوا الهرجه من طقطق لسلام عليكم... هدا الكوبري اللي يتلموا فيه اغلب المتخلفين اللي دخلوا البلد بتأشيرة حج او عمرة وبعد ما يكونوا اكلوا الاخضر واليابس في البلد يجوا يتكوا تحت هدا الكوبري لانهم عارفين نفسهم انهم حيترحلوا مجانا مصيبة ايه دي لهم أكثر من سبعة سنين والا خمسه سنين وهما جالسين في البلد أكلين وشاربين ونايمين أجوا من بلادهم يا بتأشيرة عمرة او حج ولبدوا في البلد ولا تلحلحوا طول هادي الفترة كلها ولا خرجوا وصاروا يشتغلوا في كل شي....هدا غير انه في منهم مجرمين وحراميه وبياعين وفي منهم كمان من كان يمارس الدعاره ومنهم من كان يمارس سرقة المكالمات الدولية ومنهم كمان اللي بيشتغل بالسحر والشعوذة هدا غير شغل التزوير وغير اللى يشتغل في نسخ وبيع الافلام الاباحية... عشان كده انا ابغى اسدح سؤال لكل مواطن في بلدي ليش ساكتين على هدا اللى قاعد يصير في البلد..؟ ليه ماتبلغوا عنهم عشان يقدروا المسؤولين اللي في الامن والجوازات يشوفوا شغلهم معاهم..؟ وانا عارف هادي الجهتين اللي هيه الامن والجوازات مو مقصرة في الحكاية دي وشايفة شغلها مع هادوول المتخلفين مزبووط عشان كده ما نبغاكم تسكتوا عليهم وتخلوهم يعيشوا معانا كل هادي السنين..؟.. صدقوني جرايمهم ومصايبهم بتسيء للبلد وأهل البلد وانا عارف ومتأكد مليون في المية انه في مجموعة كبيرة منهم بيشتغلوا حراس عماير وحراس مراكز تجارية وحراس مستشفيات بالله العظيم اصحاب هادي المنشآت اللي قلنا عليها كيف يستأمنوا على اهاليهم وسكانهم واموالهم وهما ساكتين على هادول المتخلفين وبعدين في شي مهم ابغى اقوله ليش مكاتب الحج والعمرة ما تشوف لها حل في الحكاية هادي والا بس فالحة تلملم الملايين من تحت راسهم وبعدين تتركهم مشعترين في كل زقاق وشارع وفي شي كمان مهم جدا اهم من الاولاني ليش الحكومة هيه اللي تتحمل مصاريف اكلهم وشربهم وسفرهم ليش ما تكون قنصلياتهم وسفاراتهم هيه اللي مسؤولة عنهم والا نحنا خلفناهم ونسيناهم عشااان كده بقووول بالفم المليان يا مسؤولين شوفوا لنا حل في الحكاية دي اللي بنعاني منها من سنييين وياريت يكون كمان في اجراءات مشددة وحازمة من دولهم وسفاراتهم لانه المثل بيقول من امن العقوبة اساء الادب وعيشوا كتييير تشوفوا كتييير.
هرجة / يا مسؤولين لجل الله شوفوا لنا حل في حكاية نظام البصمة