ياصاحبي ماعاد به صاحب وخل
كل البشر حولي وحوش وضواري
هذا زمان الكذب والجوع  والذل
وهذا زمان مدوّرين الاثاري
ماأحد ٍعلى شوفك يبي يفرش الزل
ولاأحد ٍعلى فرقاك هلّ  العباري
كل ٍبنفسه شايل الحقد والغل
ياكثر من قلبه من الطيب عاري
ناس ٍتفيّا في عمارات  وفلل
وناس ٍ فقارى ماتحصّل  مذاري
حتى الشجر ماعاد تلقى بها ظل
يبست وتذراها هبوب الذواري
والغيمة اللي وبلها مابعد  هل
صارت سراب وجف مابالغداري
ملّت خطاوي رحلتي والصبر مل
مافيه داعي للتعب  والمساري
الحنظله ما تنبت الشيح والفل
لوهي على نهر ٍ من العذب جاري
ياقل من يحرص على الطيب ياقل
وياكثر ناس ٍ بالخطايا  تماري
هدايف ٍتكرم عن المدح  وعلل
ما للشهامه في لحاهم مواري
ياصاحبي والوضع ماعاد له حل
المرجله مابين بايـع وشاري
تخالطت هزلات الايام والجل
وتساوت صقور الهدد والحباري