ضاق صدره..
حس حتى البيت اللي.. انو لد به..
صار قبره.!!
لملم انفاسه.. وبعض اوراق كراسه
شرب باقي بقايا الشاهي البارد بكاسه..!!
وخرج..
وقف على الدرج..
ولع سيجاره..!!
استرق نظره على شباك غرفة جارته..!!
شاف جاره.. وانحرج..!!
أرخى راسه.. صار نصف انسان..
ربع انسان..
ماباقي من الإنسان فيه الا لباسه..!
كان في حالة ندم..
لو طعنته وقتها ماسال منه.. نقطه دم..!!
.....
والله ياديما..
مااسامح اسلافي..!!
أخذوا الأيادي..ما..
خلوا سوى اكتافي..!!
أمشي كما الأعمى..
قدامي خلافي..!!
والنور والظلما..
حملٍ على اكتافي..!
(واغض طرفي إن بدت لي جارتي..
حتى يواري جارتي مأواها)
...
على خيال الما..
هذا الحجر طافي..
كل النسا: سلمى
وكل الرجال: وافي
لاصارت الأسمى..
تلمس وتنشافي..!!
..
وامتطى سيارته..
سار في كل اتجاهات المدينة..
لف ابو كل الشوارع
مرة نازل.. مرة طالع
مرة نازل... مرة طالع..!!
قل: يدور شلته
قل: يفكر في عذر ( للجار ) إذا علم ابوه بزلته
قل: يبي ( كفتيريا ) جايع..
يبي يشرب وياكل
قل: يدور عن حلول
او عن مشاكل..!!
قل: يسوي مايسويه المراهق..
إنحرافات وخرافات..
وسخافات.. ومهازل..
قل: يغازل..!!
....
البحر.. ويش البحر..؟!
لولا رمال الشط ، والأطفال ، واليامال..
والمرجان والأصداف والما.. والسفينة
والمسا..ويش المسا..؟!!
لولا دفا لون الستاير من شبابيك المنازل ، والنسا..
وخشوع جمر الليل في احضان المباخر..!
انت شايف ضحكة الموجه على صدر البحر تختال ؟!
شايف ضحكة الما.. كم حزينة في نوافير المدينة؟!
شايف الفرق الكبير الشاسع الواسع
شايف كم هي الأشيا تكون أجمل كثير بدون آخر...!!
............
في اليمين من التقاطع
اعترض له نور احمر
نور ساطع
صاح به: اوقف
وكان الصوت حازم حزم قاطع
خفف السرعه.!!
رخى صوت المسجل
ارتجف.!!
صاح نفس الصوت وبقوة صراخ: أوقف
وقف..
واستعاذ بطيبته من شر حراس النوايا
وين رايح..؟؟
أو إذا ماكنت رايح قلنا من وين راجع
ماأنا.. ما...
ما أنت ماعندك ادب
إنت تربية شوارع
إنت شكلك واحد مسوي سوايا
هات إثبات الهوية
حاضر وماعندي مانع
ها هـ هذي هية:
المؤهل: جامعي
والمهنة: صايع