كل يوم والتاني والاوادم بتشتكي من انقطاع الموية وكل يوم والتاني وهما متبهدلين سردادي مردادي على مكان توزيع الوايتات اليييين ما رجولهم تعبت وورمت والشمس كماان حرقت اجسامهم من كتر وقوفهم بالساعات في السرا عشان ياخدوا نصيبهم من الوايتات اللي بهدلت الشوارع وبهدلت البلد.. كل البلد صارت حفريات من تحت راس هادي الوايتات.. المسؤول عن الموية ما تنقطع الموية في بيته وهادول المواطنين والمقيمييين يتبهدلوا آخر بهدله عشان وايت ما ياخدوه الا بعد طلوووع الروح.. الموية مقطوعه في كل زقاق وفي كل شارع وفي كل حي من احياء جده في الشمال مقطوعه في الجنوب مقطوعه في الغرب مقطوعه وفي الشرق كمااان مقطوعه وجده كلها بتشتكي ونحنا كل يوم والتاني نسمع تصريحات المسؤولين عن المويه وبالفم المليان الأولاني يقولك (لا انقطاع للمياه بعد اليوم) والتاني يقولك (لا تمييز في توزيع المياه بين احياء جده) والتالت يقولك (300 مليون ريال لعلاج تسربات المياه من الشبكه العامه) والرابع يقولك (لا صحة لوجود زحام على اشياب المياه) عشان كده بقول لصاحبنا ده روح يا حبيبي وشوف بعينك في زحمه والا ما في.. وخامس تصريح -وهدا اللي فقع قلبي ومرارتي- يقولك ايه.. (تخصيص 34 مليار ريال لمشروعات المياه).. طيب فين هادي المشاريع وفين هادي المليارات اللي بتقولوا عليها ونحنا كل يوم والتاني بنتبهدل آخر بهدله من انقطاع المويه لكن اللي باين انه كل هادي التصاريح بكش في بكش وحبر على ورق كل ما حصلت مشكلة في انقطاع المويه يجيك المسؤول يقولك الاشياب وما ادراك ما الاشياب ما يحطوا حرهم ولا يشفوا غليلهم الا في الاشياب لكن انهم يتحركوا ويتلحلحوا ويشوفوا حل في المصيبه دي اللي بهدلت سكان جده يفتح الله اذن فيها طينه واذن فيها عجينه..
لا التحليه فيها خير ولا الشعيبه فيها بركه.. وكله كوووم وبطاقات سقيا دي اللي قاعدين يضحكوا على الاوادم فيها كوووم كل ما تتصل عليهم ولا يردوا عليك ولا حتى يعبروووك والله مسكين هدا المواطن اللي انخدع في هادي اللي اسمها سقيا على باله حيرتاح من المشاوير لكن اللي حصل انه زاد نكبه فوق نكبتو.. المهم قبل ما ادحدر وامشي احب اقول مبرووك لكل سكان جده تدروا ليش انا اقولكم ليش.. بعد تلاته سنوات يا حبايب كل الوايتات القديمه اللي بتشوفوها في الشوارع حيغيروها ويغيروا ألوانها.. وايت المويه الحلوه حيكون لونه ابيض ووايت موية الآبار لونه ازرق ووايت الصرف الصحي لونه اصفر وحتصيييير كلها مصنوعه من (الاستانلس ستيل) ونحنا ايامنا حيكون لونها على طول اسود مع مشكلة انقطاع المويه يعني بالبلدي كده حنعيش طول عمرنا على الوايتات عشان كده بقول لأهل جده الله يعينكم ويصبركم على هدا الموال وترى كل شي بأجره وعيشوا كتييير تشوفوا كتييير.