وعد مثـل المواعيـد القديمـه
منت والله حريص ولاشفـاوي
طعت قوم الحسد واهل  النميمه
لين غروك واخلفت  الهقـاوي
كلما جـوك حطونـي وليمـه
جاك في غيبتي طابخ وشـاوي
عالم اهل الحسد مافيـه شيمـه
يامصـدق مخيبـة  الرجـاوي
مير مادمت راضي  بالظليمـه
فانت مرتاح وإلا انـا شقـاوي
مااقدر انساك يامـال  الغنيمـه
وانت قلبك على النسيان قـاوي
جيت ابنساك خانتني  العزيمـه
طيّب القلب مايرجـع قسـاوي
معترف بالخسـاره والهزيمـه
مابقالـي حقـوق  ولادعـاوي
عقب فرقـاك ماللعمـر قيمـه
عايشٍ بالوطن مثـل الجـلاوي
التعابيـر والصـوره مقيـمـه
لكن القلب وشعـوره نحـاوي
قلب لك في معاليقـه  وسيمـه
جرحك اللي عجز عنه المداوي
في الحشا لك مداهيلٍ  عظيمـه
كنت تمرح بها سارح  وضاوي
يوم كانـت مرابـع مستديمـه
ثـم خليتهـا قفـرٍ خــلاوي
مابها عقـب فرقـاك الأليمـه
غير ريحٍ تون وذيـب عـاوي
كلمـا بشّـر الوسمـي بديمـه
في حراويك فـزت للحـراوي
واعشبت كلها حتـى الهشيمـه
عوّدت مورقه والعـود  راوي
والحرواي تمر مـرور غيمـه
عقبها يرجع الـوادي سنـاوي
وانت توعـد مواعيـدٍ عقيمـه
والوفا ماطراك ولاانت  نـاوي