فتحت باب البيت الا واسمع صوت ام فتو يلعلع... ياشيخه خافي الله حرام عليكي ابلعي ريقك خليني آخذ نفسي والُم ركبي من طلعة الدرجه.. اول قولي ليش تأخرت؟... حاضر يا ستي انا اقولك خرجت بعد ما صليت العشاء والتراويح في مسجد الفرقان اللي في حي النسيم مالقييت السياره قعدت ادووور وابرم عليها حولييين المسجد اللين رجوولي ورمت وبققت وبرضو مالقيتها.... ياساتر يارب يعني السياره انسرقت... ايوه ياستي انسرقت ولا باين لها اثر... ولسه ماخلصت من كلامي الا والحرمه انبرمت ولفت واغمى عليها... وزهمت على بنتي يافتو يافتو الحقيني الحقييني امك اغمى عليها يالطيف الطف هادي والسياره اللي انسرقت صار فيها كده لو سرقوني انا ايش حيصير فيها اكيييد حنوديها على الشرشوره .. وفاقت الحرمه وقالت طيب بلغت عنها.. ايوه يا ام فتو بلغت عنها عشان كده تاخرت شويه بعدين هيه يا ام فتو جات الحكاية على سرقه سيارتي يا كتر السيارات اللي بتنسرق صباح وليل هذا غير السرقه اللي بتصير للحريم وهما ماشين في الاسواق او في الشوارع تلاقي الحرامي منهم راكب دباب ويجي يخطف الشنطه من كتف الحرمه ويجي فاقع حتى سرقة الجوالات ما سلمت منهم تلاقي البني ادم يتكلم بالجوال وشويه ينخطف الجوال من يده عالم حراميه ومجرمه والله يا ام فتو قبل 15 سنه ماكنا نسمع عن هادي المصايب ولا هادي السرقات لكن من يوم ما كتروا هادول المتخلفييين اللي بنشوفهم في كل شارع وزقاق صرنا نسمع ونقرا مصايب وجرايم اشكال والوان عشان كده بقووول بالفم المليااااان رحلووووهم وريحوووونا منهم ومن مصايبهم وياريت تشوفوا لنا صرفه في نظام البصمه عشان نعرف مين اللي داخل ومين اللي خارج ومين الطيب ومين البطال وعيشوا كتيييير تشوفوا كتيييير... واشوفكم ان شاء الله بعد اجازة العيد واحب اقول لكل القراء والقارئات كل عام وانتو بخير وصحه وسلامه وفي امان الله.