كان أول اجتماع لهم بعد انتهاء الإجازة في استراحة أبو خالد التي اعتادوا أن يجتمعوا فيها نهاية كل أسبوع، يشكون همومهم لبعضهم البعض، منهم من يشكو هم أبنائه والدراسة وعناء الذهاب بهم صباحا إلى مدارسهم والعودة بعد الظهر، ولكن عبد العزيز بدا عليه الكدر رغم أن همومه لا تختلف كثيرا عن بقية أصدقائه والتي تتلخص في العمل والمدارس.
بدأ الحوار بتحية من المضيف أبو خالد.
أبو خالد : حياكم الله يا شباب هذا أول اجتماع لنا بعد الإجازة.
صالح : خلاص رجعنا للعمل والتعب وهموم الأولاد والمدارس.
علي : وأنت صادق يا صالح أكثر شي أشيل همه الأولاد والمدارس، لازم أوصلهم الصباح واستأذن بعد الظهر عشان أرجعهم للبيت.
أبو خالد : وش فيك يا عبد العزيز ساكت وطفشان.
عبدالعزيز : والله صادق إني طفشان.
صالح : خير إن شاء الله ايش فيك.
عبدالعزيز: أول شي هم توصيل المدارس ونفس كلامكم ومعاناتكم لكن اليوم صار معي شي ثاني.
أبو خالد : ايش هو ؟
عبدالعزيز : استأذنت اليوم عشان أروح الأحوال المدنية واخلص كرت العائلة ويوم رجعت للمكتب لقيت المدير طالبني.
علي : طيب ايش سويت رحت قابلت المدير.
عبدالعزيز: رحت للمدير، وكان زعلان لانه جاء القسم وما لقيني، قلتله رحت للأحوال المدنية عشان اطلع كرت العائلة وما اقتنع.
أبو خالد : طيب متى تروح تطلع كرت العائلة.
عبدالعزيز : المشكلة إن مدرسة البنت يقولون لازم كرت العائلة، ولهم سنة تقريبا يطلبون كرت العائلة، وأنا كل يوم أقول بكره بكره حتى انتهت السنة، ومع بداية السنة الجديدة طلبوه في أول يوم دراسة وعشان كذا اضطررت أروح الأحوال.
علي : بصراحة ما هو أنت لوحدك يا عبدالعزيز اللي يعاني من هذي المشكلة، كلنا نعاني منها إذا طلع الواحد عشان يجيب أولاده من المدرسة أو طلع عشان يراجع أي دائرة حكومية يرجع يلاقي المدير زعلان ولا محسوم عليه يوم من راتبه.
أبو خالد : طيب كل واحد يجيب لأولاده سواق ويريح نفسه.
صالح : والله لو الواحد يابو خالد عنده إمكانية انه يجيب سواق كان اختصر المسألة من البداية، وكل واحد جاب سواق وريح نفسه لكن الراتب يا دوب يكفي مصاريف البيت والأولاد، عشان كذا نضطر نوديهم ونجيبهم كل يوم بنفسنا، ومضطرين نتحمل الحسومات والإنذارات وكلام المدراء.
علي: يا جماعة تصدقون ان رخصتي انتهت قبل سنة، وما عندي وقت أروح أجددها يا أكون متكاسل ولا اقدر اطلع مرة واحدة في اليوم من العمل عشان أجيب الأولاد ولا عاد اقدر اطلع مرة ثانية.
عبدالعزيز: طيب ايش الحل من وجهة نظركم.
أبو خالد : والله لو يخلون فيه دوام في الفترة المسائية بالمصالح الحكومية أحسن عشان تقدروا تخلصوا شغلكم.
علي : والله كلامك معقول، ادري انك قلتها مزح لكن ترى هذا حل من الحلول.
عبدالعزيز: طيب كيف يا علي
علي: اقصد انه الدوائر الحكومية « الخدمية « مثل الجوازات أو البلدية والمرور من قسم تجديد الرخص ليش ما يكون في مكاتب تابعة لهم في كل منطقة يعملون في الفترة المسائية، حتى لو ثلاث ساعات وبكذا يقدر كل موظف يراجعهم في الفترة المسائية إذا كان ما يقدر ينجز عمله في الصباح.
أبو خالد : والله فكرة ممتازة تراعي ظروف الناس وتساعدهم على انجاز أعمالهم، بدل المشاكل اللي يشوفوها كل يوم في عملهم.
صالح : المفروض أنهم يفكروا في مثل هذي الأمور، وأشوفها بصراحة مهمة جدا وتخدم المواطن والمقيم وممكن تقضي على الزحام في الصباح.
عبدالعزيز : تصدقون يا شباب انه سمعت قبل كذا انه في مكتب في الرياض تابع لإدارة المرور يفتح في الفترة المسائية، وينجز معاملات نقل الملكية وبعض المعاملات الثانية بس بصراحة مو متأكد من هذا الكلام .
علي : لو كان هذا الكلام صح فهذا الشي بادرة خير، ممكن يشجع بعض الدوائر الحكومية أنها تمشي على نفس الطريقة والنهج، وأنا شخصيا من المؤيدين لهذا القرار لأني أشوف فيه فائدة للجميع وراح يحل مشاكل كثيرة.
أبو خالد : من وجهة نظر شخصية أشوف إن كلامكم فيه حل نوعا ما لهذي المشكلة، لكن لو انه كل الدوائر الحكومية فعلت انجاز المعاملات بالطريقة الالكترونية يعني عبر الانترنت، والله ما كان فيه أي مشكلة، وهذا أفضل حل يريح الناس من هم الاستئذان والطوابير وغيرها من المشاكل.
صالح: كلامك صح مئة في المئة يا أبو خالد، العالم تطور خلاص وأصبحوا ينجزوا كل معاملاتهم في وقت قياسي، وعبر الانترنت وبأسرع وقت وأتمنى أن الدوائر الحكومية عندنا تنهج نفس النهج في كل معاملاتها.
علي: أشوف ان كثير من الجهات الخدمية بدأت تفعل مثل هذي الخدمات مثل البنوك، وسمعت انه حتى رخص القيادة تقدر تجددها عن طريق الانترنت وان شاء الله البقية على الطريق ونرتاح.
عبدالعزيز : حتى رخصة القيادة لازم تروح تجددها بنفسك، وكلنا سمعنا انه في تجديد عن طريق النت لكن ما تفعل حتى الآن، وكم مرة دخلت على موقع المرور وما في هذا الكلام.
أبو خالد : هذي مشكلتنا دائما نسمع عن أشياء ويعلنوا عنها، ولكن ما يطبقوا ولا شي منها .
علي: أقول يفتحوا مكاتب تابعه لإداراتهم في الفترة المسائية أفضل في الوقت الحالي، وبعدين إذا أصبح انجاز كل المعاملات الكترونيا يقفلوا هذي المكاتب المهم إننا نلقى حل عاجل.
صالح: والله ما أشوف فيها صعوبة، إذا كانوا راغبين في إيجاد مكاتب تعمل في الفترة المسائية، أشوف أنها مسألة بسيطة تحتاج إلى إرادة وتنسيق فقط، ولا تحتاج لموافقة من جهات عليا لأنه فيها مصلحة عامة.
علي: الله يسمع منكم يا شباب، وان شاء الله وعن قريب نلقى حل.
أبو خالد: المهم عبدالعزيز يضحك ولا يزعل نفسه.
صالح «ضاحكا»: خلاص يا عبدالعزيز بكره نروح معاك للعمل ونتوسطلك عند المدير.
عبدالعزيز«مبتسما»: لا.. ما يحتاج موضوع بسيط وانحل، المهم أني قدرت اطلع كرت العائلة والحمد لله أنهم ما قالوا تعال بكرة ولا بعد بكرة، وإلا كان فصلني المدير، وشايفكم حليتوها بمقترح الدوام المسائي، لكن يا ترى المدارس برضه نخليها تداوم في المساء، ونريح أنفسنا؟