مشكلتي ياحبايب اني ما اقدر اعلق على أي خبر صحفي الا بعد فتره لأنكم زي منتو عارفين انو مقالي اسبوعي عشان كده ما اقدر اعلق على خبر زي ما بيقولوا كده (حار يا فول) عشان كده خلوكم معايا عشان نعرف هرجة اليوم ايش بتقول.. دحين انتا من ساعه ماقفلت الجريدة وانتا متنكد ومهموم وحالتك حاله وقاعد تضرب كفك اخماس في اسداس اقدراعرف ليه ؟ امسكي الجريده وشوفي الخبر قدام عيونك خبر يوجع القلب ويفور الدم ... فين ياسيدي ماني شايفتو؟ اهو قدام عيونك ومكتوب بالبنط العريض والا بس عيون كبار للهواء والغبار.. ايوه ياسيدي شفتوو.. شفتي ايش بيقول الخبر اللي كان منشور يوم الاحد 21/6/1430 (اخفاق 55% من خريجي المعاهد الصحيه بسبب الانجليزي) لانه هيئة التخصصات الطبيه ألزمتهم باختبار اللغه يعني بالبلدي كده ياطلبة المعاهد الصحيه مافي نجاح طالما مافراسكم انجليزي... بالله عليكم ياحبايب من حيكون السبب الرئيسي في المصيبه دي اللي بيعاني منها كل طلابنا وطالباتنا في المدارس والكليات والجامعات والمعاهد المختلفه على انهم مو فالحين في اللغه الانجليزيه مو (تعليمنا) اللي مو راضي يشوف صرفة في هادي اللغة الانجليزيه اللي بيتكلم بيها كل اوادم العالم ويجوا بعد كده يلوموا طلابنا وطالباتنا اذا ماجابو نتايج طيبه في اختبارات الانجليزي... اللغه الانجليزيه في مدارسنا الحكومية مالها قيمه لانهم مابيدرسوها في المدارس الحكوميه الا في الصف السادس الابتدائي بعد مايكون (مخ) طلابنا وطالباتنا (تنح) لكن لما تدخل المدارس الاهليه تشوف الاطفال الصغار يرطنو رطين... ليش ماندرس اللغه الانجليزيه في مدارسنا الحكوميه من اولى ابتدائي ايش المانع من كده على الاقل يستفيدوا منها وما يخافوا منها وتكبر اللغه الانجليزيه معاهم ويعرفوا الكلمات ومعناها ويعرفوا كيف تتركب الجمله ويعرفووا لقواعد اللغة الانجليزية وشوفوا بعد كده كيف حيكونوا أجيالنا بتتكلم خواجاتي صح وزي مابيقولو العلم في الصغر كالنقش على الحجر والحمدلله الخريجين والخريجات من كليات اللغه الانجليزيه ياكثرهم في البلد يدوروا على وظيفة ياكلووا منها عيش عينوهم في المدارس الحكوميه وخلو طلابنا وطالباتنا يتعلمو هادي اللغه العالميه من الصف الاول الابتدائي زي ما بيصير في المدارس الاهلية .. جيبوا المعلمين والمعلمات المتمكنين من اللغة الانجليزية وعينوهم في المدارس الحكومية وزودوا حصص الانجليزي خلو اولادنا وبناتنا يعرفوا راسهم من رجولهم في مادة اللغة الانجليزية بعدين ياريت تكون كتب اللغة الانجليزيه كتب محببه للطلاب والطالبات مو كتب تجيب الهم والغم كلها تعابير ومحادثات طوويلة وكلمات يبغالها السيد (دكشنري) عشان يفهموها.. والله شي يحزن هدا اللي بنشوفوا في مدارسنا الحكومية طلاب وطالبات ما يعرفوا اتجاة الرقم (9) فين ولا يعرفوا طريقة كتابة بعض الحروف .. نحنا في القرن الواحد والعشرين ولسه طلابنا وطالباتنا بينتعووا في اللغة الانجليزية الين متى حنعيش على هادي المصيبة اللي توجع القلب وتفور الدم دخيلكم دبروها يا مسؤولي التعليم وشوفولها حل وعيشوا كتييييير تشوفوا كتييييير.
abofatoo@hotmail.com
فاكس: 6764070

للتواصل ارسل رسالة نصية sms إلى الرقم 88548 الاتصالات أو الرقم 636250 موبايلي أو الرقم 737701 زين تبدأ بالرمز 150 مسـافة ثم الرسـالة