دحين انت ماسك الجريدة ومتنرفز ومعصب ليه؟ وزارة الإسكان هادي يا ستي جابت لنا الضغط والسكر والقلب، كل يوم والتاني بتسمع منهم تصاريح عجيبة غريبة، عاجبها حالنا وهيه شايفه كيف ملاك العماير هلكونا وبهدلونا بإيجاراتهم اللي قصمت ظهورنا وطفرت جيوبنا؟ ليه هما ايش قالوا يا سيدي، هما لسه بيقولوا، هادولا قالوا واللي كان كان، يقولك يا ستي انه الأراضي اللي متوفرة عندها تكفي بس لـ200 ألف وحدة سكنية، بالله ده كلام يصدقوا عاقل يعني كل هادي الأراضي اللي بملايين الأمتار واللي موجودة خارج العمران أو اللي موجودة وسط البلد وفي مواقع مرستكه ما تكفي إنه وزارة الإسكان تسوي مشاريعها عليها وتريح الغلابا من الناس من هم وقرف الإيجارات، أنا أتمنى من وزارة الإسكان أنها تسمع ايش بيقولوا الخبراء في حكاية الإسكان، يا وزارة الإسكان الأراضي خارج العمران موجودة بملايين الأمتار وملء السمع والبصر، سوى مشاريعك السكنية عليها وابنوا مدن جديدة خارج العمران وفكونا من الزحام اللي موجود وسط البلد، يا وزارة الإسكان كان في خبر نشر في جريدة الرياض بتاريخ 16/3/1431، وعلى لسان وكيل الوزارة الدكتور سليمان الرويشد بيقول «الأراضي السكنية المطورة المتوفرة حاليا في مدن وقرى المملكة تبلغ مساحتها 935 ألف هكتار، وهي حيز مكاني كافٍ لاستيعاب نحو (67.4) مليون نسمة، بمعدل كثافة منخفضة (72 شخص/ هكتار)، ويمثل نحو 263% من عدد السكان الحاليين (25.6) مليون نسمة من مواطنين ومقيمين، وهو عدد السكان المتوقع للمملكة في عام 1473ه وفق معدل النمو السكاني 2.3%؛ وقال إن الطاقة الاستيعابية للأراضي السكنية الحكومية الممنوحة من السكان بلغت حوالي 24 مليون نسمة، ومن الوحدات السكنية نحو 4 ملايين وحدة سكنية»، يا وزارة الإسكان ارحمينا من هادي التصريحات اللي ما منها فايدة، يا وزاره الإسكان المواطن الغلبان يبغى يفرح بسكن يستر فيه نفسه وأولاده قبل ما يستلم شهادة وفاته، يا وزارة الإسكان بلدنا الحمد لله فيه خير، وفيه نعمة، وفيه أراضي بملايين الأمتار في كل بقعه فيها شدي حيلك وابني مشاريعك عليها وارحموا من في الأرض يرحمكم من في السماء، والا انتو عاجبكم الحال كده... وعيشوا كتيييييير تشوفوا كتيييييير.

أمشي على مهلك ياسيدي شوف أصحاب السيارات كيف طايرين تقول هما مشاركين في سباق راليات .. ياستي خليهم براحتهم كل واحد منهم عنده عيون وعنده عقل والحجر من الأرض والدم من راسهم ، والله انا مو محزني إلا هادول الناس اللي بيحاولوا انهم يقطعوا هادي الشوارع السريعة عشان يروحوا للجهة التانية والمصيبة انهم بيعرضوا نفسهم للخطر والموت لكن ايش ذنبهم إذا كان مافي جسور مشاة تحميهم من أصحاب هادول السيارات الطايرين.. الأمانة بسلامتها فكرت وخططت وسوت خطوط سريعة عشان أصحاب الحديد لكن للأسف ما فكرت في الدم واللحم اللي بيندعس ويتقطع كل يوم والتاني على هادي الخطوط السريعة والمصيبة انه أهل الشخص اللي بيموت إذا حبوو يرفعوا قضية على الأمانة حيجيهم الرد (هوه ما عندو عيون يشوف في أحد قلوا يعدي من الشارع) في أغلب دول العالم في جسور وفي أنفاق تحت الكباري تحمي هادول الناس من هادي الخطوط المميتة وافتكر في مرة انه كان في خبر منشور في جريدتي عكاظ بتاريخ 20/1/1435 بيقول فيه أمين جدة الدكتور هاني ابو راس انه الأمانة (ستعلن خلال شهر ديسمبر 2013 المقبل عن مشاريـع جسر مشاة شارع الأندلس بالقرب من تقاطع شارع المعادي، جسر مشاة على طريق الأمير ماجد مع تقاطع صاري، جسر مشاة على طريق الأمير ماجد مقابل سوق فلامينجو وجسر مشاة على طريق الملك خالد أمام سكن وزارة الدفاع) وخلص شهـر ديسمبر من عام 2013 وقربنا على نهاية سنة 2014 وما شفنا من الحبايب ولا طوبة انحطت عشان مشاريـع الجسور اللي قال عليها أمين مدينة جدة، عشان كده بقول يا حقون الأمانة دخيلكم ابنوا جسوركم في هادي الشوارع السريعة وارحموا عباد الله اللي كل يوم بتموت بسبب عدم وجود هادي الجسور والسبب تأخير هادي المشاريـع الحيوية واللي يحتاجها البلد وأهل البلد .. وعيشوا كتيييييير تشوفوا كتيييييير.

آخر مره دخلت فيها الملعب كان عام 1420 وهفني الشوق ورجعت لدخول الملعب يوم مباراة الأهلي والخليج واللي انتهت بفوز أهلاوي باهت ماله لا طعم ولا مازية على قولة المرحوم (أبو عنتر)، وصدقوني ما رحت للملعب عشان المباراة، رحت أشوف مدينة الملك عبدالله الرياضية جوهرة الملاعب اللي كل الجمهور الرياضي بيتكلم عنها، وفعلا زي ما قالوا وزي ما شفت كان جوهرة بحق وحقيق جوهرة في التصميم وجوهرة في كل شيء فيه من الإمكانيات ومن التقنية العالمية الحديثة، المهم ما نكد عليا فرحتي بشوفة الملعب إلا مدرب الأهلي ولعيبته الكحيانين، لعيبه بيلعبوا بتعال على الكوره لعيبه بيستلموا ملايين وهما أصلا ما يستاهلوا إنهم يستلموا هادي الملايين لأنه ما عندهم روح ما عندهم إصرار إنهم يفوزوا، لعبوا مع نجران وخرجوا بالتعادل ولعبوا مع الهلال وضيعوا فرصا ما تضيع وبرضوا خرجوا بالتعادل وخسروا في بنك الدوري 4 نقاط كانت مهمه للفريق والسبب هما ومدربهم التعيس اللي ما عنده ما عند جدتي زي ما بيقولوا الحبايب، مدرب عنده قناعات عجيبة غريبة طول وقت المباراه بس حاطط يده على دقنه لا عنده تكتيك ولا عنده خطه مصمم على اللاعب اسحاق، واسحاق ده مافي راسه كوره يا ناس يا هوه اللاعب ينعرف من مسكته للكوره يا ناس ياهوه الكوره قبل لا تكون في الرجل تكون بالعقل وده ما عنده إلا طقها والحقها الفكر الكروي معدوم عنده، ما يعرف يمسك الكوره ولا يعرف كيف يباصي ولا كيف يبني هجمة رفع ضغطنا وما يعرف من الكوره إلا اسمها واللي قاتلك وقاهرك أن المدرب مصمم عليه وراكن في الاحتياط لعيبه أفضل منه مليون مره، يا ناس يا هوه لعبنا كوره في حواري جدة الييين شيب راسنا وكان في كل فريق صانع لعب بيمرر كور للمهاجمين ويقولهم جيبوا قون إلا ده المدرب مو مقتنع أنه صانع اللعب هوه رئة وشرايين الفريق عشان كده بقول لمسؤولي الأهلي وعلى راسهم الرمز خالد بن عبدالله الحقوا الأهلي ويكفي اللي سواه بيريرا اللي دمر الأهلي وطير كل اللاعيبه المميزين اللي كانوا في الفريق سواء كانوا محترفين أجانب أو سعوديين وأقولها بالفم المليان لازم يكون في صانع لعب مميز من طينة كماتشو أو من طينة رافينها إذا كان بيهمكم حال الأهلي وجماهيره، أما إذا بيستمر الحال زي ما هوه وتتركوا المدرب جروس يخبص زي ما يبغى عيني عينك أقولكم بصراحة لا تحلموا بالدوري.

يوم الأحد الجاي يمكن تحسم ويمكن ما تحسم قضية رسوم الأراضي البيضاء في اجتماع هيئة كبار العلماء ، وأتمنى من كل قلبي انها تحسم لانه خبر مفرح و سار بكل المقاييس، وأتمنى أنه يتم الموافقة عليه لانه ما بقي ولا مواطن إلا وتضرر من حال هذه الأراضي بحرمانه أو حرمان أولاده أو أقاربه من حق الحصول على سكن مناسب. أراضي بيضاء يا كترها وياكبرها مساحتها بملايين الأمتار وسعرها بمليارات الريالات مملوكة لتجار العقار وهوامير الاراضي شغالين فيها بيع وشراء مع بعضهم والمواطن الغلبان مو قادر يشتري قطعة أرض مساحتها 500 م وسط العمران بتحويشة العمر واللي جلس يلملم فيها سنين عمره لانه قطعة الارض وسط العمران واللي مساحتها 500 م وصل سعرها بالميت لـ 2 مليون ريال والغلابى اللي كانوا بيحطوا ريال فوق ريال عشان يشتروا قطعة أرض ما يقدروا يشتروا وسط العمران واذا فرضا بيشتروا ارض بيشتروا ارض بعيدة عن العمران وحيستنوا سنوات طويلة عشان تدخلها الخدمات وياعالم بيلحقوا يبنوا هادي الارض ويسكنوا فيها هما واولادهم والا يكونوا صاروا من عداد الموتى وانتقلوا الى رحمة الله . عشان كده بقول انه خبر رسوم الاراضي البيضاء حلو لكن للاسف اصحاب العقار ما ينضحك عليهم حيطلع قيمة الرسوم من قيمة الاراضي والحال ينطبق على كل التجار طالما صاحب السلعة زود فيها اكيد حيزود في قيمة السلعة على المستهلك (والبامية والفاصوليا اكبر دليل) يعني بالبلدي كده طالما في رسوم على الاراضي حتزيد قيمة الارض بسبب الرسوم اللي دفعها (وكأنك يبو زيد ما غزيت) وبنجلس نلف وندور ونبرم ولا بنلاقي حل لهادي المشكلة اللي تعبت كل الغلابى من ذوي اصحاب الدخل المفقود واللي مو لاقيين لا ارض ولا سكن عشان كده أتمنى من وزارة الاسكان انها تبني مشاريعها السكنية خارج العمران وبالاراضي اللي تملكها الدولة وياريت كمان نبني مؤسسات الدولة ومدن جديدة خارج العمران وبالاراضي اللي تملكها الدولة والحمد لله والشكر لله الدولة فيها نعمة وفيها خير وبكده نضرب ملاك وهوامير العقار في مقتل زي ما بيقولوا الكتاب الكبار وخلي أراضيهم تعفن وتخيس طالما هما محتكرينها ولا هما راضيين يبيعوها بالاسعار المعقولة واللي يقدر المواطن الغلبان انه يشتري قطعة أرض بتحويشة العمر اللي حوشها طوال سنوات عمره.. وعيشوا كتييييير تشوفوا كتييييير.

هدا خبر بالمرة حلوو كان منشور في جريدتي عكاظ قبل اسبوع بيقول إمارة الرياض تمنع العباءات النسائية المخالفة للشرع وبيقول كمان أكدت هيئة الأمر بالمعروف والنهي عن المنكر بالرياض، تلقيها تشديدا من إمارة منطقة الرياض على التقيد بالأمر السامي الكريم، الصادر منذ فترة، والذي نص على منع العباءات المخالفة للشرع وبيقول كمان كشفت أنه صدرت توجيهات بمنع بيع العباءات النسائية المخالفة شرعا بعدما أصبحت تباع علنا، وجاء المنع استنادا إلى أمر سام وفتوى صادرة من اللجنة الدائمة للإفتاء، إضافة إلى التعليمات التي نصت على التوجيه بإلزام من ضبطت لديه بإعادة تصنيعها بما يزيل المحذور الشرعي أو إتلافها، تحت إشراف الجهة الضابطة من دون المطالبة بتعويض.
المهم وأنا ماشي جنب الحرمة في مول من مولات جدة الا ما الاقي إلا وكوعها خابطني في جنبي واسمعها تقول (عسى عينك تنعمي يا بعيد) حرام عليكي ياحرمة كتمتيني هوه ايش في ؟ من ساعة ما دخلنا المول وانت عيونك مبحلقة في الحريم، ياحرمة حرام عليكي أنا عيوني مو في الحريم أنا عيوني في الفضائح والشيء المقزز والمقرف اللي لابسينو بعض من البنات وبعض من الحريم الله يهديهم ويصلحهم. ايش لابسين الحريم لابسين عبايات حسب الموضة. هادي اسمها فوضه مو موضة هادي عبايات هادي، العباية اللي أعرفها بتكون للستر والحشمة لكن هادي اسمها قلة حياء ومسخرة قال عبايات قال كأنها فساتين سهرة مطرزة ومشكشكة بالألوان والصور وعليها كتابات مخجلة وصور في الظهر وسلاسل على الخصر وفي منها محزقة ومخصرة تبين تقاطيع الجسم وفي منها كأنها جلابيات ومنها على شكل مشلح هادا غير انه في بعض البنات بالمرة بايعينها بيكتبو حرف من اسمهم ورقم البي بي حقهم في ظهر العباية بنفس لون وتطريز العباية لا والمصيبة أنهم ماشيين يتقصعوا فيها في المول بطولوا وعرضوا ولا عندهم فكرة لا عيب ولا حياء ولا خجل وهادا كله من تحت راس هادي الفضائحيات العربية اللي بتجيبلنا مصممات الأزياء اللي ماوراهم إلا خراب عقول بعض الحريم والبنات.. لكن السؤال اللي ابغالو جواب فين أهلهم عنهم فين الأب وفين الزوج وفين الأم وفين الأخ لما يشوف بنته والا بنتها والا أخته والا زوجته تخرج للسوق بالشكل الفاضح ده فين الغيرة فين الرجولة والا خلاص شالو برقع الحياء ، يا آباء يا أمهات يا إخوان يا أزواج بناتكم وزوجاتكم أمانة في رقبتكم وكل راع مسؤول عن رعيته .. المهم سحبت الحرمة من يدها وجينا خارجين وسألت رجل الأمن اللي كان واقف بيراقب حركة المول.. لو سمحت كيف أقدر أروح لبوابة رقم 3 لأنه السيارة واقفة هناك رد عليا وقال العباية بالمرة حلوة!!؟ طالعت في الراجل وقلت أحد جاب سيرة العباية، أخدت بعضي ومشيت وقلت في نفسي من كتر ماشاف أشكال وألوان العبايات اللي لابسينها البنات والحريم انسطل. وحسبي الله ونعم الوكيل.. وعيشوا كتييييير تشوفوا كتييييير.
يقول الله عز وجل في كتابة الكريم «يا أيها النبي قل لأزواجك وبناتك ونساء المؤمنين يدنين عليهن من جلابيبهن ذلك أدنى أن يعرفن فلا يؤذين وكان الله غفورا رحيما» لكن مين يفهم.

ايش ده اللي في يدك يا سيدي؟ هدا يا ستي بالدي (سطل) مليان تلج بكبوا على راسي وجسمي واتحداكي واتحدى كل الجيران واهل الحارة كلهم انهم يسووا زي ما سويت انا ، يا سيدي اعقل انت مو حق الحاجات هادي .. والله انك صادقة انا مو حق الحاجات هادي لكن الواحد ايش يقول في اصحاب العقول اللي بنشوفهم الايام هادي كل ما شافوا شيء غريب قلدوه ، يا سيدي فهمني هوه ايش اللي حصل؟ افهمك ايه واقولك ايه تصرفات تفقع المرارة وتجيب السكر وترفع الضغط ياستي هادي الايام انتشرت في بلدنا وفي بلاد تانية حكاية تحدي الثلج وشوف عاد العجب العجاب من اصحاب هادي التقليعة الجديدة والغريبة كل واحد مشهور والا وحدة مشهورة يجيبوا سطل مليان بموية ثلج ويكبوه على دماغهم وبعدها يقولوا انا اتحدى زعطان وزعطانة وفلتان وفلتانة والمصيبة انهم مو فاهمين ايش الحكاية بس تقليد وخلاص أي عقول هادي سألتكم بالله والمصيبة انه هدا التقليد بيجي من ناس عاقلة وواعية ومشهورة هيا بالله عليكم هادول اهل العقول ايش تركوا للمراهقين وصغار السن انا ماني عارف ليش هدا التحدي يكون مثلا عشان يحسوا بالمرض والمرضى أو انه مثلا للتوعية بالمرض اللي اسمه (التصلب الجانبي الضموري) بصراحة انا مو عارف ليش هما بيسووا كده لكن السؤال اللي يسدح نفسه ايش السر من كب كميات كبيرة من الموية المثلجة على رؤوسهم ياجماعة الخير ربنا بيحاسبنا على هدا الاسراف يا جماعة الخير كان بإمكانكم تسووا بروشورات تبينوا فيها أعراض المرض وطريقة الوقاية منه كان بإمكانكم تتبرعوا لهادول المرضى وانتوا عارفين نفسكم انكم من اصحاب ملايين الدولارات بدل ما نعالج المرض بمرض يجينا ويصيبنا من برودة المويه المثلجة يا جماعة الخير كان بإمكانكم تقدموا التوعية بهدا المرض بطريقة أفضل وأحسن من كده وكان بإمكانكم تزوروا هادول المرضى وتدعوا لهم وتدخلوا في نفوسهم السعادة والسرور بدل هدا التقليد اللي بنشوفه من بعض أهل العقول اللي بيقلدوا كل شيء يشوفوه والمضحك في الموضوع انتشار هادي الظاهرة بشكل عجيب وغريب في مواقع التواصل الاجتماعي ومع الخيل يا شقرا زي مابيقولوا.. عشان كده بقول يا جماعة الخير يا حبايبنا اتركونا من هادي التقليعات وهدا التقليد التافه لأنه زمان كانوا بيقولوا تقليد الأعمى يضر.. وصدق رسولنا الكريم لما قال: (ولو دخلوا جحر ضب لدخلتموه). وعيشوا كتييييير تشوفوا كتييييير.


للتواصل أرسل sms إلى 88548 الاتصالات ,636250 موبايلي, 738303 زين تبدأ بالرمز 150 مسافة ثم الرسالة
abofatoo@hotmail.com

كلها كم يوم وبتبدأ الدراسة والله يعين الغلابى من أصحاب الدخل المفقود ماصدقوا خلصوا من مقاضي وعازات رمضان طب عليهم العيد بملابسه وأثاثه وبوياته وديكوراته وبعد ما فاقوا وصحيوا من العيد ومن روحاتو وجياتوو وعيدياتوو طبت عليهم الدراسة وشوفوهم الايام دي سردادي مردادي على الاسواق ومافي الا صرف فلوس الثياب البيضاء من جنب والشنط من جنب والجزم الله يكرمكم من جنب والمراييل من جنب والله يستر كمان لا يكونوا ورطوا واشتروا من المراييل الجديدة لكن الواحد ما يقول الا الله يكون في عون الغلابى، المهم خلوكم معايا نشوف ايش بيقول مقالنا حق اليوم . ايش دي المظاريف اللي شايلها معاك ياسيدي ؟ هادي ياستي شرائح اتصالات اشتريتها من شارع فلسطين من البياعين اللي باسطين قدام المحلات والله عالم مين المستفيد من بيعها، زحمة اوادم وعالم ياكترها باسطة تبيع وتشتري في ملايين من الشرائح ولا شايلة هم احد مروقين وباسطين عيني عينك والمصيبة انهم بيبيعوا كل شرائح شركات الاتصالات واسعارهم تبدأ من 50 لحد 2000 ، لا وفي عندهم ارقام مميزة كمان لكن السؤال المهم واللي نبغى إجابته هو: فين الرقابة على هادي الشركات المشغلة لخدمات الاتصالات فينهم ساكتين على هادي الفوضى اللي جالسة بتصير في ارصفة شارع فلسطين فينهم عن هادي الفوضى اللي بتهدد أمن المجتمع واللي سببها اصلا عمالة وافدة بتستخدم هادي الشرائح من غير ما يكون عندها اقامات نظامية لانه اللي مشتري هادي الملايين من الشرائح عمالة نظامية بتشتري هادي الشرائح بأسمها وبعد كده بتبيعها على كل من هب ودب من البشر لكن السؤال المهم فين هيئة الاتصالات وتقنية المعلومات عن هادي الفوضى اللي جالسة بتصير على ارصفة شارع فلسطين وانتي اللي قلتي قبل فترة انه بيع هادي الشرائح المجهولة يعتبر مخالفة يعاقب عليها القانون طيب يا هيئة الاتصالات وتقنية المعلومات طالما تعتبر مخالفة ويعاقب عليها القانون اتحركي وشوفي حل لهادي المخالفة واللي جالسة بتصير عيانا بيانا قدام الله وخلقه عشان كده اتمنى من الجهات المختصة وعلى رأسها وزارة الداخلية انها تشوف حل لهادي البسطات اللي بتبيع وتشتري في هادي الشرائح لانه حالهم زاد ولو سكتنا عليهم ما بيجي من وراهم الا الجرائم والمصائب. وعيشوا كتيييييير تشوفوا كتيييييير.

للتواصل أرسل sms إلى 88548 الاتصالات ,636250 موبايلي, 738303 زين تبدأ بالرمز 150 مسافة ثم الرسالة
abofatoo@hotmail.com

جالس في مكتبي في أمان الله وشويه يطب عليا حبيبنا المشاكس حمدي باشويه وكان في يده ورقة وكان متنرفز ومعصب وقال بصوت عالي انت مو فالح الا تكتب على الفئران والمجاري والمطبات، شوف يبو فتو بتكتب في الموضوع اللي في يدي والا بتضارب معاك في الإدارة المالية ويا ويلوا اللي يفارع .. لا دخيلك لا مضاربة ولا غيرو هوه انا قدك انت بس روق واجلس ومخمخ على فنجان الشاهي المنعنش واعطيني الورقة اللي في يدك وما يصير خاطرك الا طيب . بيقول حبيبنا حمدي باشوية حكومتنا الرشيدة بتصرف ملاييين الريالات عشان تحسين وتجميل مدينة جدة الا انه في كتيير من الشوارع وتحت الكباري بنشوف سيارات كتيييرة بتوقف فوق الأرصفة وسيارات معطلة بتوقف تحت الكباري وخاصة الكباري اللي بتكون قريبة من ورش السيارات كانه هادي الارصفه والكباري صارت من املاك اصحاب الورش أي سيارة خربانة يحطوها تحت الكوبري هدا غير السيارات المعطلة واللي بتوقف جنب الورش واللي لها شهور وشهور واصحابها تاركينها لا هما صلحوها ولا هما شالوها من المكان اللي هيه مرمية فيه هدا غير انه بعض مندوبين النقل واللي بيشتغلوا في توزيع المواد الغذائية واللحوم والمجمدات والمبردات تلاقيهم يوقفوا سياراتهم في الشوارع الضيقة والحواري وتحت شبابيك سكنهم وبكده اخينا قفل الشارع الضيق على الرايح والجي السؤال اللي محتاج اجابه ليش اصحاب هادي الشركات ما يلزموا المندوبين حقهم انهم يرجعوا السيارات لمكان شركاتهم بدل ما يضيقوا على الناس في الشوارع بوقوف سيارات النقل اللي تخص شركاتهم هدا غير انك لو رحت على كيلو 7 خاصة جهة مجرى السيل وعند الإشارة اللي توديك لاستاد الامير عبدالله حتشوف العجب العجاب سيارات نقل وتريلات واقفه فوق الأرصفة اللي ادمرت بسبب طلوعهم ونزولهم من على هادي الأرصفة هدا غير السيارات المعطلة والمتروكة واللي لها سنيين واللي ساكت عنها المرور ولا حتى فكر بسحبها من مكانها عشان كده بقول فين دور سيارات المرور واللي بتشوف هادي الفوضى قدامها يوميا وليش ماتكتب المخالفات على اصحاب هادي السيارات ؟ وفين دور امانه جده اللي ساكته على هادول البشر اللي شوهوا صورة مدينة جده بوقوف سياراتهم المعطلة تحت الكباري ووقوف سيارتهم فوق الأرصفة واللي تحطمت واتكسرت بسببهم وليش ما تجبرهم الامانة انهم يصلحوا هادي الأرصفة اللي دمروها وحطموها بوقوفهم عليها عشان كده بتمنى انه نشوف حل لهادي الفوضى اللي بتصير في بعض من الشوارع واللي مناظرها شوهت صورة مدينتنا جده وكمل انت يبو فتو .. انت بقيت ليا شي ياحمدي انا ما حقول الا عيشوا كتيييييير تشوفوا كتيييييير.

ايش ده القرنبع اللي جايبو معاك يا سيدي ومطلعو السطوح ؟ هدا يا ستي اللي بقي من السيارة.. هدا يا ستي عمود الكرنك وهادي يا ستي المساعدات وهادي العكوسات وهدا يا ستي الجربوكس وكراسي المكينة واللديتر.. وفين باقي السيارة يا سيدي؟ هوه عاد بقي سيارة .. السيارة راحت فطيس.. ليش ايش حصل يا سيدي؟ انا اقولك ايش اللي حصل وانا راجع من الزواج وزي منتي عارفة انه عندنا بعض الشوارع مظلمة زي الكحل في الليل وجناب حضرتي نظري في الليل على قدي وعندنا في شوارعنا أغلب الأرصفة ما تنشاف ولا تبان المهم يا ستي وانا ماشي في طريق من هادي الطرق اللي مليانه للاسف في شوارعنا كان الشارع مظلم والرصيف من بداية دخلتوو مغبر ما ينشاف ولمن جيت ادخل خط الخدمة ما اسمع الا قربعة وطاخ وطيخ قلت يا واد شكلو مطب جامد اكلتوو وادعس بنزين عشان امشي مافي فايده السياره واقفه واشوف اصحاب السيارات يمشوا قدامي ويدقوا بواري وانا اقول ايشبها السيارة ما تتحرك اترنو يا ستي ابو فتو معلق فوق الرصيف وشوية اتلموا عليا الاوادم واللي يقول سلامات واللي يقول الله يعوضك واللي يقول اتصلوا على اصحاب السطحات عشان يرفعوا السيارة المعلقة.. المهم بعد حاني وماني جبت معايا هادي القطع عشان اشتري زيها من محلات قطع الغيار.. وليه تشتري اطلب تعويض من اللي كان السبب في المصيبة دي.. تعويض ههههههه ضحكتيني قال تعويض قال.. والله انتي طيبة اساسا لو قدمت شكوى وطلبت تعويض حقعد افحط والف وادور سنين وسنين عشان آخد التعويض وبعدين حكاية التعويض دي اللي بتقولي عليها ما يطبقوها الا في بلاد بره اما هنا حيجيك الرد سريع روح بلط البحر والا مع نفسك على قولت الجيل الجديد من الشباب.. يا ستي ما نبغى منهم لا تعويض ولا غيروو العوض حيجي من عند الله سبحانه وتعالى نبغاهم بس ينوروا الشوارع ويخلوا بالهم من الارصفة المغبرة اللي ما تبان في الليل يعني يا ريت مع بداية كل دخلة خدمات لشارع فرعي او مع بداية كل رصيف يدهنوا كل الارصفة بألوان فسفورية زي ما هو حاصل في اغلب البلدان العربية والاجنبية او يحطوا لمبة كووع جنب الرصيف عشان الاوادم تعرف انه في قدامها رصيف ونحافظ عليهم وعلى سياراتهم بدل هادي الخوابير الملونة اللي حطوها فوق الارصفة وكلفت ملايين الريالات والله العالم مين اللي استفاد منها.. عشان كده بقول للجهة المسؤولة عن الشوارع والارصفة هدا كلامي شفتوة وقريتوه ياريت تطبقوه لانه حياة الاوادم مو لعبة وعيشوا كتيييييير تشوفوا كتيييييير.

يا حلاوة العيد يا حلاوة.. من باب جديد يا حلاوة.. أشكال وألوان يا حلاوة، وطرمبة طرمبة يا حلاوة، وزبادي الشربة يا حلاوة... هادي هيه أهازيجنا زمان نبتديها مع أول يوم العيد، واحنا بندف في المراجيح ونفرح أولادنا وأحبابنا الصغار، ونسمع صيحاتهم وهما مبسوطين، كانت أيامنا حلوة فيها الطرب والبساطة يا ليتها ترجع بس ايش نسوي، في التطور اللي صار هو السبب شعترنا وشعتر حبايبنا، وفرق جمعتنا، والجوالات هادي وبرامجها طيرت بهجة العيد وفرحتنا، يا ليتها ترجع أيامنا، ونعيش مع حبايبنا زي ما كنا زمان، وكنا مع بعض حلوين نمشي ونعايد على الجيران، البيوت مفتوحة على بعضها، وفي الليل نتلم ونلعب الضومنه، ونفرش الحنبل، ونجيب طربيزة الكيرم، ويا سلام على لعب الفرفيرة، لما تشوف التحدي بين الحبايب، دحينا كلو راح وسط الزحمة، التقنية فرقتنا وعن وصلة الرحم بعدتنا، كنا نروح العيدروس، ونتكي في حارة المظلوم، ونمشي شويا لحارة الشام، ونأكل بليلة ونشرب توت، متى ترجع فرحتنا وأيامنا الحلوة، وبشكة الأحباب والأصحاب مع العيد وفي غير أيام العيد.