دحين انا ابغى افهم من ساعة ما جينا من بره وانت مادد براطمك شبرين ايشبك ايش في ؟ لا يا شيخة يعني مسوية نفسك ما شفتي اللي شفتوا ايش شفنا؟ ما شفنا شي؟ على كده انتي ما يبغالك نظارة طبية انتي يبغالك نظارة غوص يعني ما شفتي اللي قاعدين يشحتوا كيف مشعترين قدام كل سوبرماركت والا قدام كل مكينة صراف والا جنب محطات البنزين حتى عند الاشارات تلاقيهم .. انا ماني عارف الحبايب اللي في المكافحة ساكتين عليهم ليه والمصيبة الكبيرة انهم كل يوم وهما بيزيدوا ... هاااه برضك ما شفتي اللي انا شفتوا روحي يا شيخه فورتي دمي الله يفور دم شياطينك .... طيب خلاص لا تزعل نفسك دحين اقوم اجبلك كاسة عصير توت باردة عشان تروق شويه .. وراحت ام فتو تجيب كاس العصير ودخلت انا على الحوش ودخلت المخزن وخرجت الكريك والفاروع وقعدت احفر في الارضية واول ماشافتني الحرمة الا وقالتلي ما شاء الله عليك حتسوي لنا بركة سباحة عشان نطربش فيها ونفتك من قرف الاستراحات اللي اغلبها استراحات غالية ومعفنة وحالتها بالبلا ... بركة في عينك هوه في موية في البلد عشان اسوي بركة سباحه .. طيب ليش بتحفر في الارضية ...انا اقولك ليه؟ حسوي يا ستي قبر!! فرصعت الوليه ..عيونها وقالت قبر حرام عليك يبو فتو حتدفيني عشان ما شفت الشحاتين ... يا مثبت العقل والدين يا شيخة استني شويه ابلعي ريقك خليني اكمل كلامي ح احفر القبر عشان لمن افطس تدفنوني بكرامتي ولوحدي وعشان كمان لا يروح يصير فيا زي ما صار في الاموات اللي في مقبرة الفيصلية حشروهم بالجملة كأنهم علبة ساردين اللي ميت ومتكي على الجدر ..واللي قاعد رجل على رجل ... واوادم ميتين حاطينهم فوق بعض واللي محشورين في زاوية القبر واللي ظهره على الجدر ورجوله على فوق , وبعد خراب مالطا تسمع المسؤولين في الامانة يلعلعوا.
(لابد من اجراء تحقيق فوري وعاجل للتأكد من صحة المعلومات) وعيشوا كتييير تشوفوا كتييير.