من يوم ما بدأت الاجازه وأم فتو وبنتها جابولي الجنان نبغى نخرج ودينا نبغى نتمشى طفشنا من قعده البيت وانا اقولهم طيب حاضر بكرة بعده.. وفي يوم كفشوني عند الباب وقالوا لي ما في دخول دحين ننزل وانا اقولهم طيب طولوا بالكم بس نتغدى ونخرج. ردوا عليا بصوت واحد الغدا في المطبقيات بس انت انزل دحين لا يبرد الاكل قلتلهم امري لله حكم القوي على الضعيف وركبت السياره وشويه اسمع بيبان السيارة تترزع ياهووه يانااااس على مهلكم على البيبان لا تنخلع في يدكم ردت بنتي فتو وقالت من جمالها والا من لونها سيارتك ياابويا مقربعه حالتها بالبلا والبلا لاحقها والله ياستي مو مني من الشوارع المزبرقه مافي شارع عدل كله مدحمل ومهربد المهم وصلنا الكورنيش وصقعنا ديك الغدوه اللي يحبها قلبكم وشويه اسمع فتو بتقولي وديني عند المراجيح: بس كده.. غالي والطلب رخيص ورحنا على هناك ودخلنا على اللي بيقولوا عليها مراجيح وهيه لا مراجيح ولا ما يحزنون شويه حدايد مصديه وحالتها بالبلا  واشوفلك عالم ياكترها حريم على رجال على اطفال المهم اخدتلي ركن كده وفرشت فرشتي وقعدت انا وام فتو وقعدنا ننقنق على الشاهي والمكسرات وفتو قاعده تتمرجح وشويه وعينك ما تشوف الا النور حصان ماشي يتمخطر من جنبنا وقاعد يهز وسطه لأن صاحبه كان مشغل اغنية بنت العجرم آآآه ونص والحصان مبسوط لكن المشكلة مو في الحصان المشكلة والمصيبة الكبيرة في الاطفال اللي راكبين جوة الصندوق اللي وراء الحصان اهاليهم ما يخافوا عليهم لا يروح الحصان يهيج والا يجيهم مرض معدي منه وانا عارف ومتأكد انه الاحصنة والتانيه دي اللي اسمها السيسي والمشعترة في كل محل من هدا المكان ماهي مفحوصة وماشيه بالبركة الله يعلم ايش فيها من امراض معديه لكن ما نقول الا ربنا يستر وشويه اشوف بنتي فتو جايه علينا شكلها تعبت من اللف والدوران على المراجيح وهيه ماشية مر من جنبها دباب من الدبابات النارية اللي بيركبوها الاطفال من بنات واولاد كان ماشي زي الصاروخ لولا لطف الله كان جاب اجلها وبعدها بشويه برضوا مر دباب من جنبنا ونحنا قاعدين وفحط وغبر علينا واطالع في ام فتو اشوفها مغبرة كأنها خارجة من قبر.. المهم ربنا ستر والا كان خلاني انا وام فتو مبشور على كباب لا والمصيبة الكبيرة انه بعض الابهات والامهات هما اللي بيستأجروا هادي الدبابات لأولادهم وبناتهم كأنهم مستغنين عنهم انا ماني عارف فين المسؤولين عن هادي المتنزهات ساكتين عن هادي البلاوي اللي بتصير في هادي الاماكن اللي بتشوه صوره البلد وبتخلي العالم تبطل تدخل هادي الاماكن لخوفها على بزورتها من الحوادث والامراض اللي ممكن تجيها من تحت راس هادي الدبابات والحيوانات وعيشوا كتيييير تشوفوا كتيييييير.
abofatoo@hotmail.com
فاكس: 6764070