قصيدة رثاء في الشيخ مبلش بن سفر المرزوقي البقمي
يا الله يا رب المخاليق يا الله
يا مسقي الأرض الدهر بالمخيلة
يا عالم(ن) ما أخفاه عبدك وما أبداه
أنت الذي مدات جودك جزيلة
ربي ليا أعطى لا مرد(ن) لما أعطاه
واذا أمر مافيه أمر بديله
الجود جوده والعطايا عطاياه
والخير بيده والجنان الظليلة
أطلبك طلبة مخلص يرفع يداه
يواصل الطاعة نهاره وليله
ترحم نزيل(ن) نوخت به مطاياه
ماله سوى الله ملتجى يلتجي له
أبو حمود اللي على الطيب مبداه
أنا اشهد انه في المراجل دليله
يا رب ماله غيرك احد(ن) ترجاه
عبدك دخيلك يا منجي دخيله
يا الله تغفر ما سلف من خطاياه
وتبلغه جنتك باسهل وسيلة
مبلش ليا منه نوى الدرب ما أخطاه
حتى ويوم(ن) الموارد قليلة
مزبان من ضده زمانه ليا جاه
فقده علينا كلنا والقبيلة
ليث(ن) صميدع للهدف تثبت خطاه
زومان شيال الحمول الثقيلة
المرجلة والطيب من صنع يمناه
والقلب الأبيض والفعول الجميلة
ما غرته كثر الدراهم ودنياه
حر(ن) سما في النايفات الطويلة
ما يوم جاله في المجالس مباهاه
واليا عطا يمناه ماهي بخيلة
حلحيل حيله ما توانا ولا أضناه
سبق على وضح النقا كل جيله
لا والله الا يا النشاما فقدناه
لكن هذا الموت مافيه حيلة
لو إنها بالجاه ما نذخر الجاه
نطلب بجاه الطيب المستحيلة
ولو انها بالمال دونه دفعناه
والله لندفع لين يرضى عميله
لكن عزانا يالمطاليق بأبناه
جملة سيوف(ن) نادرات(ن) صقيلة
من راس مبلش والوصايا وصاياه
والحر في الازمات يشتد حيله
ما قصروا في ماضي الوقت واتلاه
جهد وتبرع والفعول المهيلة
راحوا الى اقصى الغرب ساعين لرضاه
وراحوا الى اقصى الشرق وقفة نبيلة
الكل منهم والي العرش يجزاه
وقفاتهم تشفي القلوب الغليلة