ان كان ما يعجبك شعري فلا تلقي له البال
تناس كل الكلام وروح دور عن بديله
انا ترى عازف من خلقتي عن قيل والقال
والهرج في منهجي يغني عن الكثرة قليلة
الهرج مثل الذهب يوزن مع العاقل بمثقال
وكلمتي ما اعرف انطقها اذا ما هي ثقيلة
ياشين طبع الذي يهذي بما يطري على البال
الكلمة يقولها لو ما توصل للجميلة
يقلون من لا يقدر هرجته خاين ومحتال
والكلمة اللي يصّدرها تجي دايم هزيلة
والشعر ما هو مجرد شيله بحدري وموال
ولا بترديد كلمة شاعر وما فيك حيله
ولا بشاعر بلا عرف ويجي للشعر قتال
يهذي بشعر هزيل وترفعه نعرة قبيله
مره يجيبه يمين ومرة يحذف به شمال
ما يحتوي منطقه الا المذلة والخجيلة
في ما مضي يا بديوي كنت بالاشعار تختال
تحمل رسالة ويتجلى كلامك بالفضيلة
واذا تأملت في شعر المثايل عبر الاجيال
اقول يا رب بن لعبون ترحم لي رعيله
والشعر جسد مواقف مثل شعرك يا ابن هذال
اللي يثير الحماس وينقله جيل لجيله
والا كما خالد اللي صار شعره مضرب امثال
اللي بالاشعار فل ولم محفوظ الحصيله
والا رشيد الزلامي يوم قال ونعم ما قال
في مجمل القول برق صد عنا ما نخيله
واليوم يا شعر صارت سيرتك يرثى لها الحال
لا وزن لا قافية لا فكر وبيوتك عليله
استرخصوك البشر واصبحت سلعة بيد جهال
في سوق هابط يسوقونك حشف وبسو كيله
والله ما قيمك يا شعر برساله بجوال
ولا يقيمك من يأخذك لاهدافه وسيله
يقيمك من يخلي للمعاني ريف وظلال
الشاعر العاقل اللي يعطي المعنى دليله
ويقيمك من يحقق للقصايد قدر واجلال
واللي يكسر بيوت الشعر ما يخلي سبيله
انا انظم الشعر واصونه وانا من قوم عقال
وارعاه مثل المزارع يوم يزرع له فسيله
يعتادها بالرعاية لين تأخذ خير منزال
واذا اكتمل طلعها يعدها خيرة نخيله
يا شعر لا تكترث لازال لك بالقلب مدهال
اهواك يا شعر واقدر معانيك الجليله