آخر مسافر

مجاريح ياللي لو تثيقلت شانك شـان
عطاشا هدب لاهان منك اشقر الغره
عيونك سفر في طرقة ٍ مالها عنـوان
خذت جملة السبع العجايب لهـا قـره
سنينك ترف وانا سنيني بقايا انسـان
رمت به مقادير الليالي علـى الجـره
يابو قد يانع ماذوى الوقت غصن البان
تمنى تحسس ساعة الرمل في سـره
تفاصيل ذكرى الغالي اللي مع الازمان
تبيحه وتتمنـى وصالـه ولـو مـره
لمع والسراب اليا لمع في فم العطشان
تقوده لـه الآمـال والطمعـه اتجـره
وانا فيك لافكـرت فالشعـر والاوزان
تفتـق درابيل الخيـالات بالـمـره
درابيل قايد فيلقـن يبـرح الميـدان
يبى ينتصر للقـدس فمحمـد الـدره
صحيح انكسرت بعين جابر ولد حيان
ولولا انكساري مااُكتشف عالم الـذره
بسيطٍ صنع تاريخ قلب وترف وجـدان
صعيب ٍ ترك كل امنياته لمـن غـره
اناديك وانته (رحت خيطٍ من الدخـان)
وانا مالي الا اندهك واعـاود الكـره
تثيقل وانا مابخسك حقك من النسيـان
ولن ماذكرتك جاتبـك نبضـةٍ حـره
وانا اول حكاية فوق ماكان بالامكـان
وآخر مسافر راح محدن عرف سـره