ما جيت احبك جيت انا هايم فيك
أبيه شعري قبل اقوله يثيرك
من بالغلا يا غالية ما يناديك
لاهو حبيب لك ولا هو اسيرك
سقت القوافي سوق سود المماليك
ونوخت بركابي على جال بيرك
ضاقت بي الدنيا وجيت احتمى فيك
يزبنك من سالف زمانه يجيرك
كانت يديني في يدينك مشابيك
واليوم ضايع مع مصيري مصيرك
يا الله عسى وقتي يصادف حراويك
ولاّ عسى رجلي تصادف مسيرك
جيتك على وضح النقا جيت شاريك
جيت ارتوي من فيض صافي غديرك
مع كاملات الزين ترجح مساويك
من يشبهك بالناس من هو نظيرك
مالك خشير في خفوق يماريك
مابه بقلبي غير حزني خشيرك
لا والذي سواك ماني يناسيك
هذا قصيدي فيك «وانت وضميرك»