ودي بشي ماتهيا لغيري
مليت من حفظ الزمان وكتابه
اكتب بجرحي واستلذ بزفيري
الله يامحلا جروح الكتابه
يغتال راعي الورد نشوة ضميري
وراعي الحطب ياتي بوقت احتطابه
البس من الدنيا طويل وقصيرِ
وامر فوق الارض مر السحابه
ايام تمشيني بشري وخيري
ويوم يمرو لايجوز احتسابه
في داخلي شاعر يحدد مصيري
ومن حسبة احلامي يكمل حسابه
يستكثر الظلما علي ويغيري
ويزين بحزني زوايا خطابه
احيان يرقى بي ولا لي نظيري
ماكن غيري له مكان ومهابه
مثل الملك لاقال قم ياوزيري
انثر عطايانا على اهل الصبابه
و احيان احسه مثل طفل غرير
وانا قلمه اليا لقاه التهى به
الشعر حرفه مثل سيف شطير
بيته غدى بيتي وكفي نصابه
يسوقني صوب الطريق العسير
وانا احمله هم وجروح وكأبه
اكذبه حفنه من كفوف الامير
واصدقه طعم الدمع وقت انسكابه
واجمله (بشرى الصوت) صوت البشير
صوت المسافر يوم ودع غيابه
من فرحته بارضه وشوف العشيرِ
اخرج زكاته قبل يكمل نصابه
وانا على درب القصيد المثير
اخفض جناحيني لحضرة جنابه
واحلم بشي ماتهيا لغيري
مليت من حفظ الزمان وكتابه

سليمان الشدوي