رسايل كتيير بتجييني من حبايبي القراء والقارئات بيطلبوا فيها اني ابدأ مقالي بلغز غاويين تعب وشقى عشان كده اليوم ح اعطيهم اللي يبغووه والله يعينهم على حل اللغز (سبحان اللي جمعنا سنين كنا حبايب متلازمين اخوان وجيران متحابين وافترقنا بعد ما هاجر كل واحد منا حزين دخلوا علينا اعداء مفرقين رحنا وراحوا المساكين وجوو غيرنا حبايب كتيرين اخوان وجيران طيبين هاااه عرفتوا احنا وهما مين) ودحين تعالوا ندخل في هرجتنا حق اليوم .. كل بعد فترة وفترة نقرأ في الجرايد انوو الحبايب اللي في وزارة الصحة اكتشفوا انه في شهادات صحية مزورة واخر هادي الاخبار اللي كان منشور في هادي الجريدة يوم الاحد 14/6/1430واللي بيقول انهم اكتشفوا ( 920) شهادة صحية مزورة و(13 ألف) ممنوعين من ممارسة المهن الصحية .. أول شي احب اشكر الحبايب اللي في الهيئة الصحية انهم اكتشفوا هادي الحالات والله يقوويهم ويكتشفووا غيرها وربنا يكفينا شر هادول المزورين المجرمين اللي ما عندهم ضمير ولا خوف من رب العباد.. لكن الاسئلة اللي بتدحدر نفسها مين هما المكلفين في لجنة التعاقد؟ وايش هيه مؤهلاتهم؟ عشان يقدروا يكتشفوا الشهادات المزورة من غيرها وبعدبن هما اكتشفوا التزوير دحين والا بعد ما كانوا أصحاب هادي الشهادات المزورة سووا العجب العجاب في الاوادم ودحدروهم على الشرشورة لانه كل يوم والتاني بنقرأ عن أخطاء طبية اللي يدخل بمبنج ويخرج مكفن واللي ينسووا في بطنوا شاش واللي ينسووا في بطنها مقص واللي يبتروا رجلوو اليمين بدل الشمال هدا غير المواليد اللي يخرج بكسر في رجله والا كسر في رقبته واللي خلع في كتفوو.. عشان كده الأخطاء الطبية لازم نسميها جريمة مو خطأ طبي لأنه صاحب هادي الشهادة مزور شهادته وهادي جريمة لوحدها هدا غير انه الحبايب اللي في الهيئة الصحية بيقولوا بعظمة لسانهم انه الشهادات الصحية المزورة بتمر بتلاته اجراءات صارمة وقوية الأولى: تشتمل على فحص المؤهلات والخبرة، والثانية يتم إرسال الشهادات المشكوك في صحتها لشركة عالمية متخصصة تعاقدت معها الهيئة لتوثيق المؤهلات من مصدر الشهادة، والتالتة: استرجاع ملفات الممارسين الصحيين المسجلين في الهيئة دوريا لإعادة دراستها من قبل إدارة الوثائق؛ للتأكد من صحة المؤهلات فيها، ومن عدم مرور أي من الشهادات المزورة على الموظفين... طييييب بعد كل هادي الاجراءات الصارمة برضوو في شهادات مزورة ليه؟ ومين السبب؟ ومين المستفيد؟ عشان كده اتمنى من الهيئة الصحية انها تفتح عينها اكتر من كده وتحمينا من دول المزورين هدا غير انه نتمنى من السفارات السعودية اللي في الخارج انها تنتبه لحاجة زي كده وانه عليها دور كبير في الحكاية دي يعني بالعربي كده لازم يتأكدوا من مصدر الشهادة الطبية من الجامعة اللي درس فيها هدا المتعاقد مو بس (طج الختم وادخل البلد) لانه هادي ارواح ناس لازم نخاف عليها هدا غير انه لازم نشهر بهدا المزور في وسائل الاعلام ونحط اسمه وصورته لانه المثل بيقول من آمن العقاب أساء الادب وعيشوا كتييييير تشوفوا كتييير.

abofatoo@hotmail.com
فاكس : 6764070

للتواصل ارسل رسالة نصية sms إلى الرقم 88548 الاتصالات أو الرقم 636250 موبايلي أو الرقم 737701 زين تبدأ بالرمز 150 مسـافة ثم الرسـالة