سلام يا حبايب وجمعه مبــاركه عليكم.. تفــتـكــروا يا حبايب لما يكونـــوا اتنين يتكــلـمـوا مع بعض فــي موضــوع ويقـــولك يووووه ده الكلام من أيام ما حفروا البحر.. المقـــوله هـــادي رجــعـتـهــا الأمانه في دي الأيام لأنـــه قــــبــل حــوالي أســبـوع قــريـــت خبر في الجريـــده إنه أمــانــة جدة (بتعكف) على دراســــــة وإنشـــاء نــفــق تحــت البحر يربط مــا بين أبحر الشــمــالي وأبحر الجــنــوبي عـــشــان تكـــون حركـــة الــسـيــر إنـسـيـابـيــة.
المهم خلصت من قراية الخبر جلســـت أضحـــك وأكركر من جوة قـــلبي إلين مصاريــني أتعــروجــت، ومن كتر الضحك انــســـدحت على ظهري.. الأوادم مزحومه في الشـــوارع من كتر التحـــفــيـــر والتكسير والــترقـــيع، والحبايب اللي فـي الأمــانـــه تــركـــوا البر وراحوا للبحر، وعلى فكره يا حبايب هدا النفـــق البحري غــير مشروع الجسر المعلق اللي قالوا عليه، يعني أبشروا يا أهالي جده حيكون عندنا جسر معلق على البحر ونفق بحري يربط أبحر الــشــــمال مــع أبحر الجنوب، وربنا يستر لا يطلعوا لنا بمشروع جديد اسمه التلفـــريك ويربطــوا كمان البحر الشــمــالي والجنوبي مع بعض، لأنه الزحمه صارت في الجو والبحر.
يا كتر المشاريع اللي بنقرا عنها من حــبـايــبـنـا اللي في الأمــانه وكــلها حبر عــلى ورق وما شـــفــنا شي، وخدوا عندكم بعض من المشاريع اللي قالت عليها الأمانه وإليين دحين ما شفناها:
تحويل بحيرة المسك إلى كورنيش في شرق جده.. تحويل مردم النفايات إلى ملعب جولف.. مد قطارات معلقة على امتداد شارع التحلية وفلسطين، وكله كوم ومـــشروع الاستاد الرياضي كوم، أول قالوا حيسووه خلف محطة الرحيلي وهدا الكلام قبل 15 سنه، بعدين قالوا لا خلونا نسوويه جنب نادي الفروسيه وبرضو ما عجبهم، لأنه الأراضي أسعارها زادت، بعد كده قالوا نســـووويه في أبوجعاله وبرضو ما زبط معاهم، إليين اتفـــقووا في الأخير إنهم يسووه خلف دواجن رضوى، يعني يا حبايب يبغالكم تضربووا 70 كيلو عــــشـــان ترووحووا للملعب، رغم إنه في أراضي شاسعه وفاضــيه وقريبه بكتيييير، لكن أيش نقول؛ هادي الأمانه وهادي مشاريعها... وعيشووا كتييييير تشوفوا كتييييير.
abofatoo@hotmail.com
فاكس: 6764070


للتواصل : ارسل رسالة نصية sms الى الرقم 88548 تبدأ بالرمز 150 مسافة ثم الرسالة