تعال بدد عتمة الليل ما عاد
صبري يجاري للظروف العنيدة
تعال بدل جاير السهر بسهاد
تعال عندي لك علوم(ن) جديدة
تعال شف بالعين من عقب الابعاد
حال(ن) غدا ما باقي له شريدة
تعال ولا ناد وجيك من غاد
اسابق اشواقي على ما تريده
بعدك حرمني لذة النوم والزاد
والشوق طيفك في خيالي يزيده
لا والذي فضلك بين أمة الضاد
عندي وسوى لك مكانة فريدة
ماهيب قصة رسم مستقبل أولاد
ولا اتخيل لجل اسطر قصيدة
جفني بدونك مهتنى الليل برقاد
ومن دونكم صرح الغلا من يشيده
انتم بداية حلم ونهاية امراد
وعشق(ن) يزيد مع الليالي رصيده
تعال ون ما جيت اباقول ويش عاد
باقي من أيام الحياة السعيدة
ونسى الهوى ولبس الفرحة احداد
وقول قلبي فاقد(ن) له فقيده
وعد عشق الغيد من عهدنا الباد
وفل فايل ذكرياتي وعيده
وجاوب الورقا على روس الاشهاد
وقول حلمي وثق الوقت قيده

حصيبان تركي الروقي