كانت تعيش بخوف ومنازعة روح
كانت وكانت تكتسي بالسوادي
الليل موحش والضحى موت وتروح
يذري عليها الوقت مثل الرمادي
والجهل يهدم له ميادين وصروح
يرعى بها مثل الدبا فالحصادي
والفقر سيف سلته جالها ضوح
فيها مسوي مثل طيـر الهدادي
فيها القبايل بين ذابح ومذبوح
فيها الضعيف يروح بين الأيادي
من غير والي ضايعه كلها جروح
ملبوسها بين العذارى حدادي
ورغم القسا في عينها آمال وطـموح
تحلم بصبح منـه النور بادي
وجاها زعيم للمغاوير ذابوح
من دونها بالروح جاها مفادي
جاها بليل خرمس كله شبوح
ويدرّان قدمه موت ماهو برادي
كفكف مدامعها وغنـت له فروح
وقالت تفضل تستحق الشدادي
ولملم شتات أطرافها وانتهى النوح
واستخرج الخيرات من كل وادي
واخذت لها مع سلـم المجد كم شوح
والأمن عم وطاب معه الرقادي
وأرسى قواعدها على عدل ابن نوح
على الكتاب وسنته خير هادي
ووصى عليها لو يجي شي ويروح
ينصان عرض المترفه فالبلادي
وعقبه ولاها كل فارس وطحطوح
عقبان نجد منزحين الأعادي
خمسة فهود إتخلي الصدر مشروح
تاريخهم يشهد لهم يالعبادي