ابويا... ابويا ... ايوه يا فتوو ايش تبغي ؟ وانت راجع من المركاز هات معاك هادي الملازم من المكتبه ... ول ول كل دي ملازم ياساتر انجليزي واحياء وكيمياء وفيزياء يا بختهم اصحاب المكاتب جالسين يسترزقووا على حسنا كل يوم والتاني طلبات لما جابو لنا الكفيه كانه الواحد ناقص مصاريف طيب خلاص وانا راجع من المركاز ح اجيبهم معايا بعدين تعالي هنا قوليلي امك فينها لا حس ولا خبر ... امي هناك في الصاله وادردب على الصاله واشوف ام فتو مسرحه قلت في نفسي شكلها وصلت المريخ واتنحنح واقول ياهوووه يانااس ترى نص الألف خمسميه ... عارفه يا سيدي انه نص الالف خمسميه بس انت اللي ما حسبت حسابك ... اوووف كلام كبير ده ايش الحكاية يا ام فتو ... لا حكاية ولا روايه دحين انت عاجبك الحال ده كل شهر وصاحب البيت ناطط علينا يبغى ايجاره اليين متى حنقعد على الحاله هادي شفلك ارضيه ابنيها او اشتري شقه تمليك وريحني وريح نفسك من الايجار اللي بهدلني وبهدلك .... من فين يا ام فتو وانتي عارفه البيير وغطاااه من يوم ما نستلم الراتب وانتي عارفه كيف بيتووزع شويه للايجار وشويه للفواتير اللي قصمت ظهورنا ونفضت جيوبنا وشويه لمصاريف الاكل والشرب وانتي عارفه كيف الاسعار كل مالها بتزيد واخر المتمه جو هوامير الاسهم واكلو الاخضر واليابس .... بس لازم تشوفلك دبره بعدين الاخبار الجديده بتقول انه سعرطن الحديد نقص ... خلاص ولا يهمك بكره ارووح اجيب طن حديد واحطووا في دهليز العماره ويصير وانتي داخله وخارجه تشوفيه وتسويلووا تعظيم سلام حديد ايه وبطيخ ايه يا ام فتوو هيه جات على الحديد بس روحي اسألي عن اسعار مواد البناء؟ روحي شوفي الاراضي بكم صار سعرها اقل ارض في مخطط محترم يبغالك 500 الف هدا اذا ما وصلت
لــ 800 الف وتقوليلي حديد وان كان على شقه تمليك يبغالك على الاقل 500 الف ريال نقدا عشان تشتري شقه تمليك ... طيب روح أي بنك من البنوك الموجوده في البلد وهما يعطوك تمويل عقاري واختار اللي تبغى يا يعطووك فيلا او شقه ... انا اروح بنك ليه قالولك مجنوون انتي ما سمعتي المتل اللي بيقوول (( لا من خيره اعطاني ولا من شره كفاني)) البنوك اللي عندنا ياخدووك لحم ويرمووك عظم لو تبغى تاخد بس قرض عقاري او تشتري فيلا بس ح يسلخووك سلخ يعني بالبلدي كده الفيلا اللي قيمتها مليوون ياخدو عليها مليون والشقه اللي قيمتها 500 الف برضو ياخدوو عليها 500 الف بنوك شغاله جزر في عباد الله بنوك ما يهمها الا ارباحها وبس تخيلي انه في 3 شهور بيكسبووا ارباح بالمليارات فما بالك بنهاية السنه لا والمصيبه ياريت انه لها مشاريع تخدم البلد عمري في حياتي ما سمعت انه بنك سوى مشاريع مدرسيه عمري ما سمعت بنك سفلت شوارع عمري ما سمعت انه بنك بنى فلل وباعها على الاوادم اللي محتاجه سكن وتكون على اقساط ميسره هادي البنوك زي الحووت بس تبغى تبلع وبس وان جات تبغى تتبرع اتبرعت بالفتات وتجي تقوليلي بنوك المهم لا تخلييني اكتر في الكلام ولا تعكنني عليا دحين خليني ارووح المركاز وخليها على رب العباد هو اللي حيفرجها من عنده وعيشووا كتييير تشوفوا كتييير.


abofatoo@hotmail.com
فاكس: 6764070

للتواصل : ارسل رسالة نصية sms الى الرقم 88548 تبدأ بالرمز 150 مسافة ثم الرسالة