دخلت البيت وكان على راسي كرتون المقاضي وفي يدي حبحبه حمراء واول ماشافتني ام فتو قالتلي ايشبك تأخرت؟
شوف الولية التاخير ده بسببك انتي... بسببي انا... ايوه انتي
انتي مو قلتي انزل سوق النورية وجيب معاك يدات ورجول الغنمة وتكون نظيفة عشان تبغي تسوي مقادم... نسيت ما تجيب معاك الصابون اللي اغسلبه المواعين... قعدت اضحك واقول الله يرحم ايام زمان ايام ما كنتي تغسلي المواعين بالرماد حاضر ياستي دحين انزل اجيبه.
ونزلت الى البقاله عشان اجيب الصابون الا وشويه اشوفلك اتنين شباب زي الورد اشتروا سته بكتات دخان وكل واحد اخد تلاته بكتات قمت حضرتي اتلقفت وسألتهم سؤال ايش تبغوا بالدخان ده كله ؟ ردوا عليا بصوت واحد وانت ايشلك شغل ... اخدت الصابون حقي وخرجت من البقاله سكاتي
ورجعت البيت وشافتني ام فتو وقالتلي ام فتو ايشبه وجهك مورم وزعلان ؟؟ خليها على الله يا ام فتو شفت اتنين شباب زي الورد اشتروا دخان بالكيلو انا ماني عارف هادول الناس مخهم فين ايش يبغوا بالدخان ده هما ما يعرفوا انه ده اللي اسمه النيكوتين من اكبر واقوى السموم على صحة الانسان هما مايعرفوا انه القطران حقت السجاير هو اللي بيسبب مرض القلب والرئة.
يا ناااااااس حرام عليكم صار عدد المدخنين في المملكة 8 ملايين والمدخنات700 ألف، و18مليار سيجارة حجم الاستيراد تدروا كم قيمتها.. قيمتها 640مليون ريال ياهووه يا ناس ايش اللي بتاخدوه من التدخين وتعالوا نحسبها سوا لو قلنا فرضا انه واحد بيدخن في اليوم 3بكتات كم مبلغهم في الشهروكم مبلغهم في السنة وكم مبلغهم لو قلنا انه الواحد قعد يدخن 40 سنه احسبوها انتوا وحتعرفوا انكم ارتكبتوا جريمة كبيرة في حق حياتكم وصحتكم يا حبايب حافظوا على صحتكم وسيبوكم من ضرب الكسجنك اللي ما وراه الا الموت والدمار وكل مين بعقله يعيش وعيشوا كتيييرتشوفوا كتييييييير.
هرجه:
الى كل الحبايب اشوفكم بعد الاجازة (في امان الله)

abofatoo@hotmail.com
فاكس: 6764070


للتواصل : ارسل رسالة نصية sms الى الرقم 88548 تبدأ بالرمز 150 مسافة ثم الرسالة