صوت المذياع كان عاليا ينبعث من السيارة المجاورة لجلسة فرحان واصدقائه فيما راح ثلة من الشباب يهتفون ويرقصون على انغام تلك الموسيقى التي يصدح صداها في كل مكان فأخذوا يفكرون بطريقة تمكنهم من اقناع اولئك الشباب لخفض الصوت واحترام من بجوارهم من عوائل خرجت للاستمتاع بالاجازة الصيفية على شاطئ البحر مثلهم. ولكن فرحان وأصدقاؤه فكروا كثيرا قبل ان يقدموا على أي خطوة خوفا من نشوب أي مشكلة فيما بينهم وبين الشباب المستمتعين بوقتهم بطريقة غير لائقة.. وبينما هم يفكرون ويتشاورون لايجاد طريقة ما تحد من إزعاجهم. فجأة انخفض صوت المذياع ودار حوار قصير بينهم وبين هيئة الأمر بالمعروف والنهي عن المنكر جعلهم يتراجعون عن تلك التصرفات غير المسؤولة واخذ فرحان ومن معه يراقبون عن كثب مندهشين لما حدث فتجسد الموقف كالتالي:
جمس الهيئة
فرحان: شباب شوفوا الهيئة جايه اكيد راحوا فيها الشباب اللي جالسين يرقصون.
عبدالرحمن: هذا «جمس» الهيئة يا فرحان رايح عليهم بس خلاص تورطوا هيا خلي الاغاني والرقص تنفعهم.
زيد: اقول يا شباب خلونا نتفرج واحنا ساكتين ونشوف ايش بيحصل معاهم بس انا متاكد انهم راحوا فيها ما فيها كلام اقل شيء توقيف وكتابة تعهدات.. خلاص اسكتوا وصلت الهيئة عندهم.
الهيئة النصيحة
وبالفعل ترجل رجل الهيئة من السيارة ومعه رجل أمن كان واقفا بجواره واقترب من الشباب فيما فرحان ورفاقه يشاهدون الموقف ولكن ما الذي حدث؟!
رجل الهيئة: السلام عليكم ورحمة الله وبركاته.
الشباب: وعليكم السلام ورحمة الله وبركاته وانصرف احد الشباب وأغلق المذياع.
رجل الهيئة: ليش قفلت الصوت خليه شغال.
رد أحد الشباب: لا يا شيخ عيب.
رجل الهيئة: طلب من رجل الأمن ان يصعد الى السيارة بكل أدب واحترام فانصرف رجل الأمن وتوجه رجل الهيئة الى ذلك الشاب قائلا: اسمك يابو الشباب, فقال: ماجد.
رجل الهيئة: اسمع يا ماجد بارك الله فيك أنت واصحابك اللي معاك انا طلبت من رجل الأمن يروح لاني ابغى اتكلم معاكم كأخ كبير وان شاء الله تفهموني صح.
ماجد: اتفضل ياشيخ واحنا تحت أمرك.
رجل الهيئة: يا ماجد انا سألتك اول ليش قفلت صوت المذياع وانت شخصيا جاوبت وقلت «لا ياشيخ عيب» طيب مادام انك تعرف انه عيب ليش ترفع الصوت وتزعج الناس اللي حولك.
ماجد: معاك حق يا شيخ واحنا غلطانين وأنا اعتذر عن نفسي وعن باقي الشباب وان شاء الله ما نكررها مرة ثانية.
ده غلط
رجل الهيئة: لا ياماجد انا ما أبغاك تعتذر ولاشيء واسمعوا ياشباب يعلم الله اني جيت اكلمكم واعتبرت نفسي اخ كبير لكم وماجيت اكلمكم بصفتي رجل هيئة او شخص مسؤول لا أبدا ولكن اللي ابغاكم تعرفوه ان اللي قاعدين تسوو غلط وانتم شباب وفاهمين والمستقبل قدامكم كبير واذا تبغوا الناس تحترمكم لازم اول شيء تنتبهوا لتصرفاتكم وتحترموا الناس عشان تحترمكم وصدقوني ما ابغى لكم الا الخير عموما ياشباب الله يهديكم وانا بسلم عليكم ورايح وانتم وضميركم اذا كان شايفين الشيء اللي تسوه صح كملوا واذا كان تشوفون انه غلط جزاكم الله خير وبارك الله فيكم وصدقوني لو جيت مرة ثانية ولقيتكم رافعين الصوت ما راح اوقف ولا أكلمكم لانكم كبار وتعرفوا مصلحتكم وانا نصحتكم وسويت اللي الله يسألني عنه.
انصرف رجل الهيئة وترك اولائك الشباب مذهولين من تعامله معهم وفرحان واصدقاؤه مازالوا يتابعون الموقف عن كثب ولكن ما هو القرار الذي اتخذوه بعدما غادر رجل الهيئة؟!
اعتراف بالخطأ
ماجد: ياشباب والله الشيخ معاه حق واحنا غلطانين خلاص خلونا نجلس ونحترم نفسنا بلا مسجل وكلام فاضي.
تحرك فرحان ومن معه وجلسوا في اماكنهم مأخوذين بتعامل رجل الهيئة مع ماجد ورفاقه رغم الخطأ الذي ارتكبوه!!
فرحان: بصراحة ما اتوقعت ان الهيئة تخليهم وتروح كنت اتوقع انه يأخذوهم للقسم.
زيد: وأنا أعجبني تعاملهم وأعجبني تفهم ماجد اللي كان جالس معاهم اعترف انه غلطان وما قال شيء.
تعامل راق
عطية: الحق لازم ينقال رجل الهيئة كان تعامله راقي مع الشباب ونصحوهم بطريقة حلوة وشوف ولا واحد فيهم تكلم وقفلوا صوت المسجل.
عبدالرحمن: طيب يا شباب ليش دائما نسمع ان رجال الهيئة ما يتفاهمون وعلى طول يشيلوك على القسم ويكتبوك تعهد ووو الخ.. كلام كثير ماله آخر نسمعه كل يوم عنهم!
فرحان: لا ياعبدالرحمن مو كلهم واذا كان في رجال هيئة ما يتفاهمون فهم قليل مره وبعدين كل انسان له طريقته في الكلام والتعامل مع الناس ورجال الهيئة بشر وكل واحد منهم له اسلوبه وطريقته في التعامل.
قصة جوال
عطية: انا اتفق معاك يا فرحان واتفق معاك ياعبدالرحمن وكلكم صح وانا شخصيا كنت حاضر موقف من المواقف بين واحد من الشباب ورجل هيئة ولكن كان الخطأ من الاثنين بصراحة رجل الهيئة طلب من الشاب جواله بطريقة غريبة والشاب رفض وصار بينهما جدال طويل انتهى بعد تدخل الشرطة واعتقد لو انه تعامل مع الشاب بنفس التعامل اللي شفناه من رجل الهيئة اللي جا قبل شوي عند الشباب اللي جالسين في جنبنا ما كان حصل اللي حصل.
زيد: يعني رجال الهيئة فيهم اللي يتفاهم واللي ما يتفاهم!!
فرحان: انا اشوف ان أي رجل هيئة تقدر تتفاهم معاه بس بصراحة في شباب شايفين نفسهم مره وحتى لو كان الواحد منهم غلطان ما يتفاهم ويصارخ ولا يعترف بغلطه واكيد أي رجل هيئة يكون في مثل هذا الموقف لازم يكون شديد معاه.
أحمد: لكن فرحان رجل الهيئة دوره النصح والارشاد والتوجيه والاصلاح ولازم يكون حليم وما يجاري أي شاب يتعصب ولا يصارخ ويحاول يفهمه بالحسنى وأنا متاكد أنه راح يتفهم ويعترف أنه غلطان.
دورات تدريبية
عبدالرحمن: اسمعوا أنا قريت في الجريدة أنه في ندوات ومحاضرات ودورات تأهيلية لرجال الهيئة وهذا دليل أنه في تقصير من بعضهم اقل شيء على مستوى التعامل وهذا ما هو عيب وأي جهاز لازم يكون فيه تقصير لكن الخطأ الاستمرار على نفس المنهج حتى لو كان غلط.
دور مهم
زيد: طيب يا شباب لو سألتكم استمرار دور هيئة الأمر بالمعروف والنهي عن المنكر ضروري ومهم؟
عطية: أنا أشوف وكلنا لازم يشوف ان دورهم مهم ومهم جدا وياشباب المفروض نقول الحمد لله انه في بلدنا ناس تهتم بمثل هذه الامور المهمة وتأمر بالمعروف وتنهى عن المنكر ولازم نشكر الله على هذه النعمة اللي احنا فيها.
فرحان: وأنت صادق يا عطية الحمد لله انا في نعمة كبيرة واتمنى انه ما عاد نسمع أي كلام ينقال عن رجال الهيئة واتمنى ان كل رجال الهيئة يكون تعاملهم مع الشباب بنفس التعامل اللي شفناه اليوم.
أحمد: ان شاء الله يا شباب كلنا نتمنى هذا الشيء.
عبدالرحمن: شوفوا ياشباب ماجد واللي معاه مروحين.
فرحان: الله يستر علينا وعليهم لكن اليوم تعلموا درس ما ينسوه طول عمرهم.
أحمد: ماهم بس اللي تعلموا حتى إحنا تعلمنا معاهم هذا الدرس اللي ما ننساه طول عمرنا في التعامل الراقي.