وانا ماشي بالسيارة الا واسمع ام فتو بتقول خد هادي الورقة وجيب اللي مكتوب فيها بالكامل ولا حاجة تنقص.. برضنا انتي لسه عايشه على طلبات الورقة وجيب المقاضي كلها ولا تنسى حاجة هادا الكلام كان زمان ايام ما كانت الاسعار على قدنا دحين الاسعار كل مالها في العلالي كل شي يخطر في بالك زاد حتى موية الصحة زاد سعرها وتقوليلي ورقة مقاضي خلينا كده ناخد حاجتنا كل يوم بيومه وربك يفرجها من عنده وخلينا كل يوم نسمع اسطوانة رجال الاعمال والتجار والاقتصاديين اللي بيقولوا انه كل ده من تحت راس الدولار طيييب.. المهم وانا ماشي بالسيارة تجي عيني على باص مهربد مدهمل وتقولي ام فتو معقوولة هذا باص ينقل معلمات وطالبات حالته بالشكل ده ونحنا في وسط البلد؟ شفتي كيف ونحنا في وسط البلد والباص حالته بالشكل ده فما بالك بالسيارات الخصوصي اللي بيستأجروها المعلمات ويقطعوا مسافة ياكبرها من بيوتهم للقرى عشان يوصلوا لمدارسهم تلاقي السيارة كحيانة وكفراتها ممسوحة لانه صاحبها ما يهمه اهم شي يلم الغلة قبل ما يخلص الشهر ولا يطالع في السيارة ولا يتفقدها كمان والله مساكين هادول المعلمات يتبهدلوا آخر بهدلة عشان يقوموا برسالتهم على أكمل وجه وقوق كل ده محد معبرهم ويفرحهم بالنقل اللي هما يبغووه كل سنة وهما بيعانوا من حركة النقل وماعندك احد يجبر بخاطرهم ويخفف عنهم معاناتهم حوادث المعلمات كل يوم بتزيد والقضاء والقدر مؤمنين فيه بس لازم يكون في حلول تخفف علينا وعلى المعلمات هادي المصايب لانه اللي نعرفه انه المعلمة اللي بتدرس في القرى تلاقيها قبل الفجر بساعتين صاحية عشان تقدر توصل لمدرستها يعني حتى ما تقدر تشوف طلبات اولادها من اكل ولبس قبل ما يروحوا للمدرسة وبعدين انا ابغى افهم ليش وزارة التربية ما تعين معلمات من نفس هادي المناطق اللي هما ساكنين فيها وبلاشي من شعتره المعلمات في كل مكان وابغى افهم كمان ليش ما يكون دوام الدراسة في هادي المدارس البعيدة على الساعة 9 ويكون الخروج على الساعة 2 ويكون كمان في تخفيف الحصص عشان تقدر المعلمة تشوف حالها من طلبات اسرية من تربية وامور بيتها هذا غير انه لازم وزارة المواصلات تشوف لها حل في حكاية الطرق اللي حالتها بالبلا طرق مدهملة لاسفلتة ولا ما يحزنون, طريق رايح جاي وربنا يستر منه هذا غير انه هادي الطرق ما فيها متابعة ولا رقابة من المرور واهم شي نسيت اقوله هوه ياريت يكون في شركات نقل محترمة تقوم بنقل هادول المعلمات من بيوتهم لمدارسهم والعكس وبلاشي من السيارات القرنبع اللي بهدلتهم وجابت اجلهم وقبل ما ادحدر وامشي اقول الله يكون في عون معلماتنا ويحميهم من بلاوي الطرق وحوادثها واللي ماتوا منهم نقول لاهاليهم عظم الله اجركم ويصبركم على ما ابتليتوا فيه وعيشوا كتيير تشوفوا كتيير.
حل لغز الاسبوع الماضي : الفصفص
abofatoo@hotmail.com
فاكس: 6764070