يا مرحبا ترحيب مخلص من الراس
بالقائد الوافي جزيل الفعايل
اهدي مشاعر صادقة واصدق احساس
هدية لمشّرفين المثايل
هدية للي له الطيب نبراس
الليث أبو متعب عريب السلايل
اللي فعوله كلها ترفع الراس
له تاتي ابياتي سريعة عجايل
بالدين والعفة وحنكة على ساس
نزه الجناب وللفعايل دلايل
من يفعل المعروف تشهد له الناس
وله يشهد التاريخ صدق صمايل
والقائد الصنديد للمجد عساس
يهوم هومات بعاد هوايل
يقطع مشاوير العنا بقوة الباس
وله الصعايب باذن ربي سهايل
ليا شد كيد الخصم والحبل مساس
شجاعته ترهق قوي الحبايل
وله بالكرم ممساك كف ونوماس
وله بالتواضع والمكارم فضايل
وله قمة العليا ومجده على ساس
من روس قوم والفعايل هوايل
اللي لياركبو على قب الافراس
وتخالط الميدان صايل وجايل
وابوه صيروم له الفعل نبراس
تشهد على فعله جميع القبايل
ليث على ضرب العدا يمرس امراس
واعداه من ضربه تذوق النكايل
عز الدخيل ولوسط القوم مدباس
يمشي على الموت الحمر ما يسايل
عسى له الجنة مقرن ومرواس
بالخلد ابو تركي جزيل الفعايل
وختامها ترحيب من قلب واحساس
أهلا بابو متعب زعيم الاوايل
قال الشريف وزج حبر وقرطاس
والشعر بالطيّب يجي له دلايل