دحين انتي فين رايحه شايله معاكي الكفتيره والكروانه .... يعني منت عارف ياسيدي طالعه عند جارتنا اللي فوق اصلها حتولد وقبل شوية اتصلوا على الداية عشان تجيهم وتشوف شغلها معاها عشان كده انا طالعه فوق بالموية الفايرة اللي في الكفتيره والكروانه لزوم الولاده زي منت عارف ... طيب الحمدلله انه لسه في دايات في البلد ويرحم ايام زمان لما كانوا الدايات هما اللي بيولدوا حريمنا ولا كان في لخبطه ولا وجع قلب وخير ماسوت بدل ماتروح المستشفى وتولد هناك وبعد كده يعطوها ولد او بنت مو لها وتصير لخبطه وحوسه وحقي ومو حقي عشان كده تولد في بيتها ابركلها مستشفيات صارت تجيب الجنان وناس شغاله فيها بالبركه صار البني ادم عندهم أي كلام بني ادم دم ولحم احد يلخبط فيه وده يروح عند اهل ده وده يروح عند اهل ده مصيبه ايه دي ... اربعه سنيين وطفل عايش في حضن ام مو امه كيف بالله عليكم حتقدر دي الام انها تبتعد عن ده الولد بعد ما اعطته حليبها وحضنها ورعايتها وخوفها عليه كيف حيكون حالها كيف حتكون نفسيتها بعد ما تعرف بعد اربعه سنيين انه ده الولد مو ولدها كيف ح تقدر انها تغير مشاعرها بعد ما رضعتوا سنتين من عمره ياناس حرام عليكم أم تكون شايله في بطنها نونو لمدة 9 شهور ولما تولد يسلموها ولد مو ولدها وربنا يستر لا يكون في حالات غير كده ومحد اكتشفها هيا بالله عليكم كيف حيكون حال هادول الطفلين وكيف حيكون حال امهاتهم بعد ما عرفوا المصيبه دي وكيف حتكون مشاعرهم بعد ما عرفوا انه كل وحده عاشت مع ولد مو ولدها طول هادي الفتره لكن المصيبه انه ولدها ايوه ولدها لانها رضعتوا واعطتوا عطفها وحنانها وكانت تخاف عليه من الهواء الطاير وعاشت معاه اربعه سنين هيه احلى ايام الطفوله كيف حيكون حالهم لما يعرفوا الحقيقه عشان كده بقول وبالفم المليان يا مستشفياتنا سواء كانت حكومية او اهلية دخيلكم ولجل الله خلو بالكم من المرضى والمراجعيين لانه الناس بصراحه صاروا يخافوا على نفسهم من كتر ما يسمعوا ويقروا في الجرايد عن مصايب هادي المستشفيات والا انتو يرضيكم انه البني ادم يدخل عندكم سليم ويخرج من عندكم مكفن لكن ما اقول الا ربنا يستر ايش حيجينا منكم كمان وشمس تطلع خبر يبان وعيشوا كتيييرتشوفوا كتييير .