صباح الخير يا حبايب وعيدكم مبارك وكل عام وانتو بخييير... دحييين انت شايل معاك دلة القهوة واللبنية واللدو والمكسرات والزورونباك وكمان لابس الفوطه والفنيلة أبو عسكري اللي من أيام هتلر فييين رايح في يوووم العيد؟... عيد هههه ضحكتيني أي عيد ده... هما هادوول المسؤولين حقون الموية يخلوك تعيّد وبعدين حكون رايح فييين حرووح ابسط عندهم وامسك سرى مع أمة لا إله إلا الله اللي هناك ومنها نعايد على الأوادم اللي ماسكييين سرى ومستنييين دورهم عشان ياخدوا وايت.... وأكيد حتكون هناك زحمة رجال وحريم حتى العوايل خرجت بحريمها عشان يمسكوا سرى عشان يبغوا موية.. وأكيد كمان حتكون هناك طوابييير واصله لآخر السور وهما واقفيييين على رجولهم والشمس تصقع فيهم عشان قطرة مويه هدا غير السوق السوداء اللي شغاله هناك زي الحلاوة وايت المويه وصل سعره لـ500 ريال... عييييب والله عييييب بعض حقون المويه يحبوا ينكدوا على الناس حتى وهما في أيام العيد يعني بالبلدي كده ما عندهم نظر يعني الناس في عيد وفرحة وهادوول جالسيين يقطعوا في الموية.... يعني بدال الأوادم ما يستقبلوا ضيوفهم وأهلهم وأقاربهم في بيوتهم أخدوا بعضهم وراحوا يمسكوا سرى بالساعات في النهار وفي أنصاص الليالي في كل جدة شمالها وجنوبها وشرقها وغربها ما في بيت في جدة إلا واشتكى من انقطاع المويه في أيام العيد نكدوا على الناس عيدهم وفرحتهم ولازم يهجولوك ويمرمطوك عشان تحصلك وايت مويه.... 40 يووم والأوادم ما عندها موية في بيوتها عالم ما تخاف الله بس جالسين في بيوتهم وحاطييين رجل على رجل والموية بتصب في بزابيزهم ولا يوووم تنقطع عندهم لكن لو انقطعت عنهم الموية ساعه زمان بس حيقلبوا الدنيا فوقاني تحتاني وحيعرفوا كماان ان الله حق لكن هما مو فالحييين الا في التصريحات كل يوم والتاني تقرا هرجهم ولعلعتهم في الجرايد واللي ما لها لزمه وكله حبر على ورق وزي ما بيقولوا الكلام ما عليه جمرك يا ناس يا هووه ترى دعوة المظلوم مستجابة خافوا الله في النااااس.. أنا ماني عارف الييين متى وجدة بتشتكي من انقطاع المويه.... والييين متى وجدة حتشتكي من تكسييير وتحفييير الشوارع والييين متى وجدة حتشتكي من الصرف الصحي... لكن ما أقول إلا الله يعينكم يا أهل جدة ويصبركم على اللي انتو فيه وعيشوا كتييير تشوفوا كتييير.
فاكس: