لسه باركب سيارتي الا واشوفلك اولاد الحاره قالبين الشارع ملعب كوره ومافي الا شووت والحكم يصفر هنا فاول وهنا اوت وياويله لو حسب بلنتي تلاقي العيال هاجوا عليه ومافي الا سب.. بس وتجي الكوره جنبي واكفشها برجلي واشوف العيال متلمييين عليا.. وقالوا بصوت واحد هات الكوره يبو فتو خلينا نكمل لعب؟ دحين انتو مالقيتوا تلعبوا كوره الا في الشارع وقدام البيوت روحوا شوفوا ملعب بره الحي جيرانكم يبغوا يرتاحوا يبغوا يناموا وانتو قالبييين الشارع شعتره وشوووت وبرشمه وتصفير.. ردوا عليا بصوت واحد هوه في مكان الواحد يلعب فيه كل ما لقيوا مكان فاضي قلبوه موووول ونحنا ما عندنا غير الشوارع نلعب فيها.. رميتلهم الكوره وقلت في نفسي معاكم حق وانا ماشي بالسياره قعدت اهرج نفسي وقلت حقون المجلس البلدي ما سووا ولا شي من يوم ما الاوادم انتخبوهم لكن ايام ما كانت الانتخابات لسه في بدايتها كانوا بالمره مهتمين وقالبين البلد فوقاني تحتاني وهيلمان وزيطه وزمبليطه تشوفوهم في الجرايد مسوييين اعلانات بالاف الريالات وكمان سووا برشورات وعلقوها في الشوارع (انتخبوا فلان وصوتوا لزعطان) وعرفوا ينصبوا الخيام ويسووا العزايم ومافي الا دق في اللحوم والارزاز ويجيبوا الشعراء ويسووا المحاضرات ونحنا حنكون مع المواطن نحنا حنوصل صوتوا للمسؤولين ونحنا ونحنا وكله كلاااام فاضي وبكش في بكش من يوم ما انتخبوهم ماشفنا منهم ولا حاجه... الشوارع مبهدله اخر بهدله لا سفلته ولا اناره تدخل اغلب الاحياء في جده تلاقيها ظلمه زي الكحل وقالوا كمان حنسوي في كل حي في جده ملاعب عشان اولاد الحاره يلعبوا كوره براحتهم وكمان برضوا قالوا حيسووا حدايق عشان اهل الحي يتلموا فيه وقت ما يبغوا من هدا كله اللي قالووه ما شفنا ولا حاجه بس كلها وعود في وعود وكله من (جنب القده) بس تدروا احلى حاجه سووها ايش هيه بعد ما عرفنا مين هما اللي فازوا في الانتخابات احلى حاجه سووها انهم باركوا لبعض واحتفلوا مع بعض وكل مجموعه منهم سوت العزايم في الفنادق والاستراحات عشانهم فازوا في الانتخابات لكن يسووا حاجه للبلد واهل البلد يفتح الله لكن ايش نقول اكيد حيكون في انتخابات تانيه وقابلوني لو في احد انتخبكم او حتى طالع فيكم وعيشوا كتيييير تشوفوا كتييير.