* كل ما تتصل عليهم وتقولهم شبكتكم خربانه ارسلوا (تجاوزت حدك الائتماني) اي حد! الناس محتاجه ابراج شبكة في حاراتها عشان ما تتعب وهيه تتصل وشركة الاتصالات ولا هيه هنا ادن من طين وادن فيها عجين اغلب الناس بتشتكي من خراب الشبكة او عدم وجودها من اساسه والاتصالات لاحنه ولامنه رغم ملايين الريالات اللي بيعدوها في النهار وفي الليل.
* قبل اسبوعين قريت خبر في جريدة بيقول انه بنات كلية التربية في جدة ما استلموا مكافآتهم من 8 شهور ليه كده بس انا ابغى اسأل سؤال واحد لحبايبنا في المالية ترضوا انه احد يأخر رواتبكم يوم واحد بس؟! صدقوني حتقلبوا الدنيا فوقاني تحتاني وحتقولوا بالفم المليان (لا). طيب ليه تحرموا بناتنا من مصروفهم اللي بياكلوا منه عيش ويركبوا الباص منها ويشتروا كتب الكلية اللي طلباتها ما تخلص فيا ريت كده اللي في المالية يحنوا على البنات ويصرفوا لهم مكافآتهم وما يحرموهم من حقوقهم .
* كل يوم نقرأ في الجرايد ونسمع في الراديو عن اعلاناتهم وعن خدماتهم للعملاء.. وأول ما تدخل داك البنك تلاقي الدنيا معكوكة عك عندهم تجي تسألهم ايش الحكاية يا هوووه ردوا عليك بالفم المليان (السستم) اشبه (البستم) يقولوا عطلان من ساعة ما جابوه والدنيا مخبوصة عندهم العميل يقعد مرزوع على الكرسي بالساعات لا! وفروعهم زي (حُق الصلصة) هدا وهما آخر السنة بيعلنوا عن ارباحهم اللي بالمليارات ولكن ما أقول إلاعيشوا كتيييير تشوفوا كتيييير.
abofatoo@hotmail.com
فاكس: 6763842