دحين ابغى اعرف انت مدخلنا هادي الحواري والأزقة ليه؟ حلحلت صواميل عظام جسمي من المطبات والحفر اللي موجودة في هادي الحواري.. ضحكتيني يا أم فتو وهيه هادي حاجه جديدة على جدة.. بعدين تعال قولي يا ابو فتو ايشبهم العالم دي حاطين عيونهم علينا كأننا جايين من كوكب تاني.. معاكي حق في الكلام اللي قولتيه نحنا اللي صرنا اغراب في نظرهم من بعد ما اهل البلد تركوا هادي الحارات ونسيوا الماضي الجميل اللي كانوا عايشين فيه خلاص دخلت هادي الحواري ناس من كل شكل ولون.. ومن يوم ما تركوا هادول الناس بيوتها وهجوا منها وسكنت هادي الجنسيات الحواري الا والمصايب كترت في البلد والمصيبة الكبيرة انهم كل ما رحلوهم او سفروهم رجعوا تاني كيف.. ماني عارف.. ومو بس حارة واحدة.. في كل حارة قديمة تلاقي هادي المصايب والبلاوي في السبيل وفي الجامعة وفي المكرونة والعزيزية والرحاب رغم انها احياء جديدة ويا ريتهم ساكنين بطريقة نظامية الا متخلفين عمرة ومتخلفين حج واللي دخل البلد عن طريق التهريب يعني هذا جزاء البلد دي اللي فتحتلكم ارضها عشان تسكنوا فيها.. والله يا ام فتو قبل 20 سنة ما كنا نسمع عن هادي البلاوي.
وعشان كده اتمنى من المسؤولين في هدا البلد وخاصة (عمد الحواري وحبايبنا اللي في البلدية) انهم يشوفوا حل للحارات العشوائية هادي اللي بتكتر فيها كل المصايب والجرايم اللي بنسمع ونقرا عنها كل يوم في الجرايد يعني بالعربي كده الحارات اللي ما لها لزمه هدوها وريحونا منها ومن بلاويها واذا انا غلطان ردوا عليا والين متى يا ناس وعيشوا كتييير تشوفوا كتييير.

abofatoo@hotmail.com
فاكس: 6764070