أنا عارف انه الكلام اللي حقوله اليوم يمكن يزعل حبيبنا غازي القصيبي شوية.. لكن برضو انا عارف انه قلبه كبير زي عوايده معانا نحنا الكتاب الغلابا.. المهم خلينا ندخل في هرجتنا لكن قبل ماادخل في هرجتي ابغى اقلب المواجع على حبيبنا القصيبي شوية واقول له فاكر شهر شعبان من سنة 1423 يعني قبل ثلاث سنين قلتوا ياسيدي انه بنهاية سنة 1425 خلاص ما حيكون في اي اجنبي يسوق سيارة ليموزين يعني بالعربي كده اللي حيسوقوا سيارات الليموزين حيكونوا من اولاد البلد وفي اول يوم من سنة 1426تأجل القرار الى ما بعد سنة 1428 بعد ما اولاد البلد ورطوا مع شركات السيارات لأنه الاتفاق اللي كان بينهم (اشتغلوا وسددوا) لكن اللي حصل انهم لا اشتغلوا ولا سددوا لكنهم مساكين ورطوا.
على العموم هدا الكلام اللي قلتوا دحين يخليني ادردب وادحدر على قرار تأجيل توظيف المرأة في اماكن بيع الملابس الداخلية للنساء هدا القرار اللي نشر قبل اسبوع وخلى كل بنات البلد اللي كانوا يدوروا على وظيفة ياكلوا منها عيش في حالة من الزعل والقلق لأنه العمل بالنسبة لهم مو دلع ولا رفاهية.. العمل ده حياكلوا منه عيش وحيساعدوا اهلهم في الحياة الكريمة لأنه بيحفظها ويشغل وقت فراغها لأنه يا سيدي بعض الاسر ما عندها عائل وبعض الاسر ما عندهم الا بنات وكانت تنتظر الفرج عشان تتوظف وتقدر تلاقي لقمة عيش كريمة لها ولأهلها لأنه الوظائف في البلد معدومة هدا غير المطلقات والارامل اللي كانوا يتمنوا انهم يلاقوا هادي الوظيفة عشان يكفوا نفسهم ذل السؤال ويستروا نفسهم من البلاوي والمصايب اللي نسمع عنها هادي الايام.
بعدين ايش فيها لما بنات البلد يشتغلوا في وظيفة زي هادي على الاقل لما تجي الزبونة تشتري عازتها من الملابس الداخلية تشتريها براحتها وعلى مزاجها تاخد اللي تبغاه من الالوان والاشكال والمقاسات لأنه اللي قدامها وحده بنت زيها ما حيكون بينهم احراج لكن لما يكون البياع اللي قدامها راجل والبعيد تكون عينه زايغه الحرمه نفسها ما تعرف تشتري وفوق كل ده انه هادي الاماكن اللي حيبيعوا فيها البنات حيكون لها وضع معين يعني ما حتكون مكشوفة للرايح والجاي وغير كده انه ما حيدخلها الا الحريم بس.. وعلى فكرة ترى عندنا بنات في البلد متخرجين من سنين وجالسين في البيوت الى الآن ما حصلوا وظائف هدا غير اللي حيتخرجوا السنة دي عشان كده لازم نحافظ على بناتنا ونوفر لهم الوظيفة المناسبة عشان ما يكون عندنا بطاله وفقر لأنه لو حصل وكان عندنا بطاله وفقر اكيد ومليون في الميه حيكون عندنا انحرافات وجرائم عشان كده لازم نفتح ابواب العمل امام بنات بلدنا عشان نحافظ عليهم من ظروف ومشاكل الحياة الصعبة.
abofatoo@hotmail.com
فاكس: 6764070