يا أم فتو.. يا أم فتو.. يا أم فتو.. وول هدا كله ولا تسمع فين راحت الحرمة دي..
نعم نعم ايش في يا سيدي صوتك واصل لآخر الحارة.. ايش في.. حلقي انشقر وانا بزهم عليكي بتلعبي طيش انتي وفتو والا ايه؟.. لا يا سيدي لا بالعب طيش ولا زقطه حتى.. انا كنت اعبي موية في البالدي من البرميل اللي في الخارجه.. البيت معدوم ومعفن زي منت شايف والمواعين يا كترها في المطبخ والحوايج يا كترها في الغسالة والموية لها اسبوعين مقطوعة ولسه ما صبت في الخزان.. بعدين تعال هنا قولي انا محتاسة في البيت وانت لابس الفوطه والفلينة ابو عسكري اللي من ايام هتلر وشايل معاك الدقديق (اللحاف) ورايح على فين في الظهرية هادي.
رايح يا ستي على الغردقة او شرم الشيخ يعني بالله عليكي فين حكون رايح.. رايح امسك سرى مع الاوادم اللي واقفه هناك اللي بتدور على قطرة موية وعاد شوفي كم حيكون رقمي في السرى عشان كده اخدت معايا الدقديق والمخده لأني عارف حلاقي امة لا اله إلا الله واقفه هناك هدا غير السوق اللي حينفتح هناك.
سوق ايه يبو فتو هوه البلد ناقصه اسواق ما يكفي المولات اللي في البلد اللي زي العمى على القلب في كل زقاق وشارع في مول.. لا يا ستي هدا سوق يختلف عن هادي الاسواق هدا سوق يسموه السوق السوده يعني اللي يبغى وايت من بره بره يكع فلوس يعني يوصل سعر الوايت لـ500 ريال والمصيبة الكبيرة انك كل يوم تقرا في الجرايد نحنا صبينا ونحنا ضخينا واللي يضحك اكثر انك تشوف الاعلانات حق الترشيد هوه في موية أساساً عشان تترشد والله مصيبة بلد فيها بحر والموية مقطوعة عند الناس بالأسابيع.. وأوادم ما عندها موية وأوادم يلعبوا بالموية لعب.
يا هوووه يا نااااس افتحو البزابيز للأوادم وارحمونا شويه عشان ربنا يرحمكم لأنه الله سبحانه وتعالى بيقول في كتابه الكريم: {وجعلنا من الماء كل شيء حي».

abofatoo@hotmail.com
فاكس: 6764070